बिरामीलाई अन्यत्र रेफर गर्ने गुनासो बढेपछि जिल्ला अस्पताल इनरुवामा प्रदेश १ का सामाजिक विकास मन्त्री जयराम यादवले छड्के अनुगमन गरेका छन् । बिहीबार बिहान मन्त्री यादवले छड्के अनुगमन गरेको मन्त्रीका स्वकीय सचिव देवेन्द्रप्रसाद यादवले जानकारी दिए ।
बिहीबार बिहानै अस्पताल पुगेका मन्त्री यादवले अस्पतालको फार्मेसी कक्ष, बिरामीको अवस्था, सरसफाइ, एक्स–रे कक्षलगायतका कोठाहरूमा पुगेर अनुगमन गरेका हुन् । अनुगमनका क्रममा विशेषज्ञ चिकित्सकको अभाव, सरसफाइमा कमी, औषधिको अभावलगायतका समस्याहरू देखा परेको मन्त्री यादवले बताए ।
मन्त्री यादवसँगै सुनसरीको प्रमुख जिल्ला अधिकारी इन्द्रदेव यादवले पनि अनुगमन गरेका थिए ।
