कहिलेकाहीँ आफूले प्रतिनिधित्व गरेको टिमलाई बचाउन गरिने खराब ट्याकलका कारण र कहिलेकाहीँ विपक्षी खेलाडी भकुरेमा एउटा फुटबलरले रातो कार्ड पाउँछ । त्यसबाहेक पनि अनेकौँ कारण हुन सक्छन् रेफ्रीले रातो कार्ड दिने ।
रेड कार्ड पाउने प्रायः खेलाडी डिफेन्डर हुन्छन् । यसको अर्थ रक्षात्मक खेल्दै गर्दा आफ्नो टिमविरुद्ध गोल गर्ने खेलाडीमाथि फउल र खराब ट्याकल हुन्छ । यसकारण डिफेन्डरले रातो कार्ड पाउने सम्भावना धेरै हुन्छ । र, रक्षात्मक खेल वा झगडालुको कुरामा भने सबैभन्दा अगाडि आउँछन्, स्पेनिस डिफेन्डर सर्जियो रामोस ।
रामोस फुटबल इतिहासका उत्कृष्ट डिफेन्डरमध्येका एक हुन्, जसले आफ्नो टोलीको रक्षा गर्नेमात्र नभएर गोल गर्ने क्षमता पनि राख्छन् । ३५ वर्षीय रामोस सर्वाधिक धेरै गोल गर्ने डिफेन्डरको सूचीमा चौथो स्थानमा आउँछन् ।
तर टोलीको रक्षा गर्नेक्रममा कतिपय स्थानमा झेली नै खेल्नुपर्ने अवस्था आउँछ, कुनै समय झगडै गर्नुपर्ने पनि हुनसक्छ । यस्तो बेलामा रेफ्रीबाट पाउने सजाय पहेँलो कार्डदेखि रातो कार्ड हुन सक्छ । रातो कार्ड भनेको मैदानबाहिर पठाउन दिइन्छ भने पहेँलो कार्ड चेतावनीका साथ दिइन्छ ।
रामोस ती खेलाडी हुन्, जसले हालसम्म सबैभन्दा धेरै रेड कार्ड पाएका छन् । उनी सर्वाधिक धेरै पटक रातो कार्ड पाउने फुटबलर हुन् । सेभिल्लाबाट रियल मड्रिड र त्यहाँबाट हाल फ्रान्सेली क्लब पेरिस सेन्ट जर्मेन (पिएसजी) खेलिरहेका रामोसले हालसम्म २६ वटा रातो कार्ड पाएका छन् ।
‘झगडालु’ खेलाडी मानिने उनको यो खराब रेकर्ड फराकिलो छ । जबकि, सर्वाधिक धेरै रातो कार्ड खाने खेलाडीको सूचीमा दोस्रो स्थानमा रहेका खेलाडीभन्दा रामोस १० वटा रेड कार्डले अगाडि छन् । उनले अन्तिम रेड कार्ड भने सन् २०२० को फेब्रुअरीमा च्याम्पियन्स लिगअन्तर्गत म्यानचेस्टर सिटीविरुद्ध पाएका थिए ।
दोस्रो स्थानमा छन्, थियागो मोटा र फिलिपे मेक्सेस । यी दुवै खेलाडीले समान १६–१६ वटा रातो कार्ड पाएका छन् । गोन्जालो रोड्रिग्वेजले १५ वटा रातो कार्ड पाएका छन् । १४ वटा रातो कार्ड पाउने खेलाडीहरू भने चार जना छन् ।
ज्लाटान इब्राहिमोचि पनि चौथो स्थानमा छन्, ४० वर्षीय इब्राहिमोभिकले २०२०–२१ को सिजनमा दुईवटा रातो कार्ड पाएका थिए । त्यसबाहेक जिउनेच्याम्प, लोपो, मुन्तारी र पिन्जीले पनि १४ वटा रातो कार्ड पाएका छन् । रामोसका क्राइम पार्टनर मानिने पेपे भने टप–१० मा पनि अटाएका छैनन् ।
