चिकित्सा शिक्षा सुधारका अभियन्ता डा. गोविन्द केसीको स्वास्थ्य अवस्था जटिल बन्दै गएको भन्दै नेपाल चिकित्सक संघले उनको जीवन रक्षाका लागि तत्काल पहल गर्न सरकारसँग माग गरेको छ।
संघका अध्यक्ष डा. बद्रि रिजाल र महासचिव डा. विश्वराज दवाडीले बिहीबार संयुक्त प्रेस विज्ञप्ति जारी गर्दै सरकारको ध्यानाकर्षण गराएका हुन्।
सरकारले गरेका नियुक्ति सच्याउन र विगतमा भएका सहमति कार्यान्वयन गर्न माग राख्दै डा. केसी आठ दिनदेखि सत्याग्रहमा छन्। लामो समयदेखि अनशनमा रहेका उनको स्वास्थ्यमा जटिल समस्या देखिएको संघले जनाएको छ।
संघले डा. केसीसँग तत्काल वार्ताको वातावरण बनाउन र उनले उठाएका जायज माग सम्बोधन गरी समस्याको समाधान खोज्न सरकारलाई आग्रह गरेको छ।
त्यस्तै, डा. केसीको जीवन रक्षाका लागि आवश्यक कदमबारे छलफल गर्न संघले शुक्रबार दिउँसो १ बजे आफ्नै कार्यालयमा कार्यक्रम आयोजना गर्ने जनाएको छ।
अघिल्लो सत्याग्रहका क्रममा सरकारले गरेका सहमति कार्यान्वयन नगरेको र त्यसविपरीत स्वार्थ बाझिने गरी स्वास्थ्य संस्थामा नियुक्ति गरेको भन्दै डा. केसी पुनः सत्याग्रहमा बसेका हुन्। स्वास्थ्य अवस्था बिग्रिएपछि उनलाई इलामबाट काठमाडौं ल्याएर त्रिवि शिक्षण अस्पतालमा भर्ना गरिएको छ।
