विराटनगर। अमेरिकी राष्ट्रपति डोनाल्ड ट्रम्पले इरानको सैन्य तथा आणविक क्षमतामा ठूलो क्षति पुर्याइसकेको दाबी गर्दै अझै केही महत्त्वपूर्ण स्थलमा आक्रमण गर्न बाँकी रहेको बताएका छन्। उनले ‘पिकएक्स माउन्टेन’ नामक शङ्कास्पद आणविक स्थललाई पनि सम्भावित निशानाका रूपमा उल्लेख गरेका छन्।
शनिबार फ्लोरिडास्थित आफ्नो निवासमा पत्रकारहरूसँग कुरा गर्दै ट्रम्पले अमेरिका र इजरायलले फेब्रुअरीको अन्त्यमा सुरु गरेको युद्ध अन्त्य गर्न इरानसँग भइरहेको वार्ता सकारात्मक दिशामा अघि बढेको बताए। तर, इरानलाई पूर्ण रूपमा विश्वास गर्न नसकिने उनको भनाइ थियो।
ट्रम्पका अनुसार अमेरिकाले तत्काल थप सैन्य कारबाही गर्ने हतार गरेको छैन। यद्यपि, इरानका एक वा दुईवटा स्थलमा आक्रमण गर्न बाँकी रहेको र आवश्यक परे छोटो समयमै कारबाही गर्न सकिने उनले चेतावनी दिए।
उनले ‘पिकएक्स माउन्टेन’लाई भूमिगत आणविक परिसर हुन सक्ने आशङ्कासहित निशाना बनाउनुपर्ने बताएका छन्। तर, इरानले उक्त स्थानमा कुनै पनि आणविक गतिविधि नरहेको दाबी गर्दै आएको छ।
यसैबीच, अमेरिकी विदेशमन्त्री मार्को रुबियोले इरानमाथि थप आक्रमण गर्नेबारे ट्रम्पले कुनै निर्णय नगरेको स्पष्ट पारेका छन्। उनले अमेरिकाले कूटनीतिक माध्यमबाट समस्या समाधान गर्न चाहेको पनि बताएका छन्।
अर्कोतर्फ, अमेरिकी मध्यावधि निर्वाचनपछि इरानमाथि पुनः आक्रमण हुन सक्ने ट्रम्पको चेतावनीका बीच इरानका सर्वोच्च नेताले अमेरिका र इजरायललाई नयाँ आक्रमण नगर्न चेतावनी दिएका छन्।
यसअघि ट्रम्पले इरानलाई पूर्ण रूपमा पराजित गर्ने वा नगर्ने भन्ने विषयमा आफूले विचार गरिरहेको बताएका थिए। पछिल्लो अभिव्यक्तिले वार्तामार्फत समाधान खोज्ने प्रयाससँगै इरानमाथि थप सैन्य दबाब सिर्जना गर्ने अमेरिकी रणनीति पनि कायमै रहेको सङ्केत गरेको छ।
