विराटनगर। सुनसरीको इनरुवाबाट प्रहरीले ९१५ किलोभन्दा बढी गाँजासहित चार जनालाई पक्राउ गरेको छ। प्रहरीले इनरुवा नगरपालिका–४ स्थित एक घरमा खानतलासी गर्दा ९१५ किलो ६८० ग्राम गाँजाजस्तो पदार्थ बरामद गरेको हो।
जिल्ला प्रहरी कार्यालय सुनसरीका अनुसार शनिबार राति करिब १ः३० बजे ज्ञानोदय टोलस्थित बुलबुल यादवको घरमा गाँजाको बिक्रीवितरण भइरहेको भन्ने विशेष सूचना प्राप्त भएपछि प्रहरी टोली परिचालन गरिएको थियो।
घरमा खानतलासी गर्ने क्रममा लुकाइछिपाइ राखिएको गाँजाजस्तो पदार्थ फेला परेको प्रहरीले जनाएको छ। घटनामा संलग्न रहेको आरोपमा प्रहरीले इनरुवा–४ का ३६ वर्षीय बुलबुल यादव, २३ वर्षीय सन्तोष यादव, ३० वर्षीय आशिष यादव र दुहबी नगरपालिका–१० का २२ वर्षीय कुन्दन यादवलाई नियन्त्रणमा लिएको छ।
प्रहरीले घटनास्थलबाट को १–०२–००१ प ९१९९ नम्बरको मोटरसाइकलसमेत बरामद गरेको छ।
बरामद पदार्थ र पक्राउ परेका व्यक्तिहरूबारे थप अनुसन्धान भइरहेको जिल्ला प्रहरी कार्यालय सुनसरीले जनाएको छ।
