विराटनगर । पूर्वाधार विकासमन्त्री सुनिल लम्सालले अत्यधिक हिमपातका कारण अवरुद्ध भएको कर्णाली करिडोरअन्तर्गतको नारापास–हिल्सा सडक खण्ड तिन दिनभित्र सञ्चालनमा ल्याउने गरी काम तीव्र पारिएको बताएका छन्।
उनले आज सामाजिक सञ्जालमार्फत अवरुद्ध सडक खुलाउन मन्त्रालयको डिभिजन टोलीले जोखिमपूर्ण अवस्थामा काम गरिरहेको जानकारी दिएका हुन्।
समुद्री सतहबाट करिब ४ हजार ५०० मिटरको उचाइमा रहेको यस सडक खण्डको नाउरपानी क्षेत्रमा बाक्लो हिउँ जमेका कारण यातायात अवरुद्ध छ। उक्त क्षेत्रमा आवश्यक उपकरण र जनशक्ति परिचालन गरी हिउँ पन्छाउने काम धमाधम भइरहेको छ ।
रोजगारीका लागि हिल्सा नाका हुँदै उत्तरतर्फ चीनको ताक्लाकोट पुगेका नेपाली नागरिकहरूलाई चाडपर्वको समयमा स्वदेश तथा घर फर्कन सहज होस् भन्ने उद्देश्यले सडक खुलाउने कामलाई उच्च प्राथमिकता दिइएको उनले उल्लेख गरे।
