बाढी र पहिरोका कारण गण्डकी प्रदेशका म्याग्दी र गोरखाका दुई प्रमुख सडक खण्ड प्रभावित भएका छन्। प्रहरीको पछिल्लो विवरणअनुसार म्याग्दीको बेनी–जोमसोम सडकमा एकतर्फी यातायात सञ्चालन भइरहेको छ भने गोरखाको आरुघाट क्षेत्रमा सडक पूर्ण रूपमा अवरुद्ध छ।
म्याग्दीको रघुगंगा गाउँपालिका–२ बैसरीस्थित बेनी–जोमसोम सडक खण्डमा गत असोज १० गते पहिरो गएको थियो। पहिरोका कारण अवरुद्ध भएको सडक अहिले एकतर्फी रूपमा सञ्चालनमा ल्याइएको प्रहरीले जनाएको छ।
यता, गोरखाको आरुघाट गाउँपालिका–२ र ३ तथा वडा नम्बर ९ को नयाँपुल क्षेत्रमा असोज २५ गते आएको बाढीले सडक आवागमन ठप्प पारेको छ। बाढीले सोतीस्थित फलामे पुल र आरुघाटबाट धादिङ जोड्ने मुख्य सडकको पुल बगाएपछि उक्त क्षेत्रको यातायात सेवा अवरुद्ध भएको हो।
प्राकृतिक विपद्का कारण दुवै सडक खण्डमा यात्रा गर्ने सर्वसाधारण प्रभावित भएका छन्। विशेषगरी गोरखाको आरुघाट क्षेत्रमा पुलमा भएको क्षतिले सडक सम्पर्क पुनःस्थापना गर्न चुनौती थपेको छ।
