सरकारी सेवामा कार्यरत कर्मचारीलाई स्वास्थ्य बिमा कार्यक्रममा समेट्न स्वास्थ्य तथा खाद्य स्वच्छता मन्त्रालयले सम्बन्धित निकायसँग समन्वय अघि बढाएको छ।
मन्त्रालयले भूमि व्यवस्था, सहकारी तथा गरिबी निवारण मन्त्रालय र सङ्घीय मामिला तथा सामान्य प्रशासन मन्त्रालयलाई पत्र पठाउँदै स्वास्थ्य बिमा ऐन तथा नियमावलीमा उल्लेखित व्यवस्थाअनुसार कर्मचारीको आबद्धता सुनिश्चित गर्न आवश्यक सहजीकरण गरिदिन अनुरोध गरेको हो।
मन्त्रालयका अनुसार सङ्घीय सरकारका विभिन्न मन्त्रालय, सचिवालय र आयोगका साथै प्रदेश तथा स्थानीय तहमा कार्यरत राष्ट्रसेवक कर्मचारीलाई बिमा कार्यक्रममा सहभागी गराउन सम्बन्धित निकायमार्फत पत्राचार र समन्वय गर्न आग्रह गरिएको छ।
सरकारी सेवामा रहेका कर्मचारीको स्वास्थ्य बिमामा सहभागिता बढाउनु र कार्यक्रमलाई थप व्यवस्थित बनाउनु यस पहलको मुख्य उद्देश्य रहेको छ। सम्बन्धित निकायबीच समन्वय गरेर कर्मचारीलाई स्वास्थ्य बिमाको दायरामा ल्याउने प्रयास गरिएको मन्त्रालयले जनाएको छ।
