आज बुधबार दिउँसोदेखि शुक्र ग्रह पश्चिम दिशामा अस्त हुने भएको छ। ज्योतिषीय मान्यताअनुसार शुक्र अस्तको अवधि आगामी कात्तिक ११ गते बुधबार राति १२ बजेर ४९ मिनेटसम्म रहनेछ। यसबीच बडादसैँ परे पनि देवी पूजा, टीका र जमरा ग्रहण गर्न कुनै बाधा नपर्ने बताइएको छ।
ज्योतिष शास्त्रमा सूर्यसँग १० डिग्रीभन्दा कम कोणीय दूरीमा पुगेपछि ग्रह अस्त हुने मान्यता छ। शुक्र ग्रहलाई धन, प्रेम, विवाह, विलासिता, ज्ञान तथा शुभ कार्यको कारक मानिने भएकाले यसको अस्त अवस्थालाई नयाँ माङ्गलिक कार्य सुरु गर्न अनुकूल मानिँदैन।
शास्त्रीय मान्यताअनुसार बृहस्पति र शुक्र अस्त हुनुभन्दा तीन दिनअघिदेखि सूतक लाग्ने तथा ग्रह उदय भएको तीन दिनपछि मात्रै शुभ कार्य सुरु गर्न मिल्ने मानिन्छ। त्यसैले यस अवधिमा विवाह, व्रतबन्ध, गृहप्रवेश, नयाँ घर निर्माण, देवताको प्राणप्रतिष्ठा तथा अन्य नयाँ माङ्गलिक कार्य गर्न निषेध गरिएको छ।
तर, नित्य तथा नैमित्तिक धार्मिक कर्ममा भने रोक नहुने बताइएको छ। स्नान, सन्ध्या, नियमित पूजा, तुलसी पूजा, श्राद्ध, तर्पणलगायतका कर्म गर्न सकिनेछ। बडादसैँका अवसरमा गरिने नवदुर्गा पूजा, सप्तशती चण्डी पाठ, फूलपाती, महाअष्टमी, महानवमी र विजयादशमीको पूजा तथा हातहतियार पूजा पनि गर्न सकिनेछ।
त्यसैगरी, दुर्गा भवानीको प्रसादस्वरूप टीका र जमरा ग्रहण गर्न शुक्र अस्तले कुनै शास्त्रीय बाधा नपार्ने उल्लेख गरिएको छ। यसले दसैँको नियमित पूजाआजा र पारिवारिक टीका कार्यक्रम प्रभावित नहुने स्पष्ट पारेको छ।
शुक्र ग्रहलाई सवारीसाधन र विलासितासँग पनि जोडेर हेरिने भएकाले यस अवधिमा नयाँ सवारीसाधन खरिद–बिक्री तथा विलासी सामग्रीसम्बन्धी काममा सावधानी अपनाउन ज्योतिषीय मान्यताले सुझाव दिन्छ।
समग्रमा, शुक्र अस्तको अवधिमा नियमित धार्मिक कार्य र दसैँका पूजाआजा गर्न सकिने भए पनि विवाह, गृहप्रवेश, व्रतबन्धजस्ता नयाँ शुभ कार्य भने शास्त्रीय मान्यताअनुसार स्थगित गर्नुपर्ने हुन्छ।
