पाकिस्तानको खैबर पख्तुनख्वा प्रान्तमा आपत्कालीन शासन लागू गरिएपछि पूर्वप्रधानमन्त्री इमरान खानको पार्टी पाकिस्तान तहरीक–ए–इन्साफ (पीटीआई) का २७८ सदस्यलाई प्रहरीले नियन्त्रणमा लिएको छ।
प्रहरी अधिकारीहरूका अनुसार इमरान खानको रिहाइको माग गर्दै आइतबार भएको सरकारविरोधी प्रदर्शनपछि प्रान्तमा आपत्कालीन शासन घोषणा गरिएको थियो। त्यसपछि पार्टीका नेता तथा कार्यकर्तालाई हिरासतमा लिन थालिएको हो।
खानका समर्थकहरू देशको कमजोर आर्थिक अवस्थाप्रति असन्तुष्टि जनाउँदै सरकारविरुद्ध प्रदर्शनमा उत्रिएका छन्। हजारौँ समर्थक खैबर पख्तुनख्वामा पदयात्रामा सहभागी भइरहेका बेला अफगानिस्तानसँग सीमा जोडिएका क्षेत्रमा आतङ्कवादी गतिविधि बढेपछि सुरक्षा चुनौतीसमेत गम्भीर बनेको छ।
पीटीआईका अनुसार प्रान्तका मुख्यमन्त्री सोहेल अफ्रिदीलाई असाधारण संवैधानिक उपाय घोषणा भएको केही घण्टापछि पक्राउ गरिएको थियो। एक प्रशासनिक अधिकारीले उनलाई सुरुमा आधिकारिक निवासमा सुरक्षात्मक हिरासतमा राखिएको र पछि अर्को स्थानमा सारिएको जानकारी दिएका छन्। तर, उनलाई कहाँ लगिएको हो भन्नेबारे खुलाइएको छैन।
खैबर पख्तुनख्वा पीटीआईको प्रमुख राजनीतिक आधार क्षेत्र हो। सङ्घीय सरकारले प्रान्तीय प्रशासन आतङ्कवादी गतिविधि नियन्त्रण गर्न असफल भएको आरोप लगाउँदै आपत्कालीन शासन आवश्यक रहेको दाबी गरेको छ। सुरक्षा अवस्था सुधार नभएसम्म पीटीआई नेतृत्वको प्रान्तीय सरकार प्रभावकारी रूपमा सञ्चालन हुन नसक्ने सरकारको भनाइ छ।
यता, पीटीआईले भने आपत्कालीन शासनलाई अलोकतान्त्रिक कदम भन्दै विरोध गरेको छ। पार्टीले यसलाई सङ्घीय सरकारको सत्ता कब्जा गर्ने प्रयासका रूपमा व्याख्या गरेको छ।
पूर्वक्रिकेट खेलाडीसमेत रहेका इमरान खान सन् २०२३ अगस्टदेखि जेलमा छन्। सन् २०२३ मेमा सरकार र सैन्य प्रतिष्ठानविरुद्ध भएका हिंसात्मक प्रदर्शनपछि उनीमाथि भ्रष्टाचार तथा हिंसा भड्काएको लगायतका आरोप लगाइएको थियो। खान र उनको कानुनी टोलीले भने ती आरोप अस्वीकार गर्दै राजनीतिक प्रतिशोधका आधारमा मुद्दा लगाइएको दाबी गर्दै आएका छन्।
