२६ असोज, म्याग्दी । म्याग्दी र मुस्ताङलाई राष्ट्रिय राजमार्गसँग जोड्ने वैकल्पिक बागलुङ–बेनी सडकमा पर्ने भसभसे पहिरो यातायात सञ्चालनको प्रमुख बाधा बनेको छ। बेनी नगरपालिका–२ स्थित यस क्षेत्रमा सडक भासिने र हिलोमा सवारीसाधन फस्ने समस्या बढेपछि यात्रु तथा चालकले सास्ती भोगिरहेका छन्।
असोज ८ देखि ११ गतेसम्म परेको अविरल वर्षाका कारण म्याग्दी र कालीगण्डकी नदीको दोभाननजिकै रहेको भसभसेमा नदी कटान भएको थियो। त्यसपछि सडक भासिँदा सवारीसाधन सञ्चालन कठिन हुनुका साथै दुर्घटनाको जोखिमसमेत बढेको छ।
पर्वत र बागलुङ जोड्ने मालढुङ्गास्थित सडक पुलको पहुँचमार्ग कालीगण्डकी नदीले बगाएपछि वैकल्पिक मार्गका रूपमा बागलुङ–बेनी–मालढुङ्गा सडक प्रयोग भइरहेको छ। मध्यपहाडी लोकमार्ग हुँदै बागलुङ, रुकुम पूर्व–पश्चिम र जाजरकोटबाट पोखरा तथा काठमाडौं आवतजावत गर्ने सवारीसाधनसमेत यही सडकमा निर्भर छन्। यसले सडकमा सवारी चाप थप बढाएको छ।
बेनी–२ खबराका कमल सुवेदीका अनुसार भसभसेमा सडक भासिएको ठाउँमा गाडी हिलोमा फस्ने, उकालो चढ्न नसक्ने र लामो समयसम्म जाम हुने समस्या छ। करिब एक सय मिटर सडक दुईदेखि तीन मिटर तल भासिएको र दबिएको उनले बताए।
गत आर्थिक वर्ष २०८१/८२ मा सडक डिभिजन कार्यालय बागलुङले पहिरो क्षेत्रमा भूमिगत पानी व्यवस्थापन र हिलो हुने भागमा ढलान गरेको थियो। तर, अहिले ढलान गरिएको सडकसमेत भासिएको छ।
जिल्ला समन्वय समिति म्याग्दीकी कार्यवाहक प्रमुख डिलकुमारी खत्रीले सडक डिभिजन कार्यालयले ग्राभेल राख्ने र उपकरण परिचालन गरी मर्मतको प्रयास गरे पनि समस्या समाधान हुन नसकेको बताइन्। ग्राभेल राखेपछि पनि सडक पुनः दबिने गरेकाले फसेका सवारीसाधनलाई डोजरको सहायताले निकाल्नुपर्ने अवस्था रहेको उनको भनाइ छ।
भसभसे पहिरोका कारण नजिकैको खबरा गाउँसमेत जोखिममा परेको छ। समस्या दीर्घकालीन रूपमा समाधान गर्न म्याग्दी र कालीगण्डकी नदीको दोभानमा पक्की पर्खालसहित तटबन्ध निर्माण गर्ने तथा पहिरोग्रस्त क्षेत्रमा सडकको सतह मिलाएर पक्की बनाउने पहल भइरहेको खत्रीले जानकारी दिइन्।
