गोरखाको चुमनुब्री गाउँपालिका हुँदै बग्ने बूढीगण्डकी नदीमा आएको बाढीले आरुघाटस्थित पुल बगाएको छ। आज बिहान साढे ४ बजे आएको बाढीले गोरखा र धादिङ जिल्ला जोड्ने पुल बगाएको हो।
बाढीका कारण गोरखाको आरुघाटस्थित नदी मापन केन्द्रमा बूढीगण्डकी नदीको जलसतह खतराको तहभन्दा माथि पुगेको छ। नदीको सतह बढेसँगै राष्ट्रिय विपद् जोखिम न्यूनीकरण तथा व्यवस्थापन प्राधिकरणले तल्लो तटीय क्षेत्रका बासिन्दालाई सतर्क रहन आग्रह गरेको छ।
प्राधिकरणका अनुसार बूढीगण्डकी नदीमा आएको बाढीका कारण गोरखा, धादिङ, तनहुँ, चितवन, नवलपरासी पूर्व र नवलपरासी पश्चिमका नदी तटीय क्षेत्रमा जोखिम हुन सक्ने भएकाले सावधानी अपनाउन अनुरोध गरिएको छ।
सम्भावित बाढीको जोखिमलाई ध्यानमा राख्दै नदी आसपासका बासिन्दालाई सतर्क रहन, नदी किनारमा नजान तथा जोखिमको अवस्था देखिए सुरक्षित स्थानमा जान आग्रह गरिएको छ।
