गोरखाको आरुघाटस्थित नदी मापन केन्द्रमा बूढीगण्डकी नदीको जलसतह खतराको तहभन्दा माथि पुगेको छ। नदीमा पानीको सतह बढेसँगै राष्ट्रिय विपद् जोखिम न्यूनीकरण तथा व्यवस्थापन प्राधिकरणले तल्लो तटीय क्षेत्रका बासिन्दालाई सतर्क रहन आग्रह गरेको छ।
प्राधिकरणका अनुसार बूढीगण्डकी नदीमा आएको बाढीका कारण आरुघाट क्षेत्रमा पानीको सतहले खतराको तह पार गरेको हो। यसबाट नदीको तल्लो तटीय क्षेत्रमा समेत बाढीको जोखिम हुन सक्ने भएकाले सावधानी अपनाउन अनुरोध गरिएको छ।
सम्भावित जोखिमलाई ध्यानमा राख्दै गोरखा, धादिङ, तनहुँ, चितवन, नवलपरासी पूर्व र नवलपरासी पश्चिमका नदी तटीय क्षेत्रमा बसोबास गर्ने नागरिकलाई सतर्क रहन आग्रह गरिएको छ।
नदी आसपासका बासिन्दालाई जलसतहको अवस्थाबारे जानकारी राख्न, नदी किनारमा नजान तथा जोखिम देखिए सुरक्षित स्थानतर्फ जान आग्रह गरिएको छ।
