विराटनगर- नेपाली कांग्रेसको सभापतिमा गगनकुमार थापा निर्वाचित भएका छन्। १५ औं महाधिवेशनअन्तर्गत शनिवार बिहान सम्पन्न मतगनाअनुसार सभापतिमा थापा निर्वाचित भएका हुन्।
महाधिवेशनअन्तर्गत शुक्रबार मतदान भएको थियो। लगत्तै राति अबेरबाट काठमाडौंको राष्ट्रिय सभा गृहमा मतगणना सुरु भएको थियो।
सभापतिमा निर्वाचित भएका थापाले ६ हजार ५८४ मत प्राप्त गरेका छन्। त्यस्तै थापासँग प्रतिस्पर्धामा उत्रिएका श्यामकृष्ण खड्गीले ३७५ मत पाएका छन्। सभापतिका दुई प्रतिस्पर्धीका लागि खसेको मतमध्ये ५४ मत बदर भएको थियो।
महाधिवेशनमा ७ हजार ३ सय १७ जना महाधिवेशन प्रतिनिधि रहेकामा ७ हजार ३९ जनाले मतदान गरेको निर्वाचन समितिले जनाएको छ। सभापतिबाहेकका मतपेटिका भने पार्टी कार्यालय सानेपामा लगिएको छ। उक्त मत आज दिउँसोदेखि गणना गर्ने तयारी छ।
