काठमाडौं । अखिल नेपाल फुटबल संघ (एन्फा) का अध्यक्ष पंकजविक्रम नेम्बाङ र महासचिव किरण राईसहित चार जनाविरुद्ध जिल्ला अदालत ललितपुरमा मुद्दा दायर भएको छ।
जिल्ला सरकारी वकिल कार्यालय ललितपुरले एन्फाभित्र भएको भनिएको आर्थिक अनियमितता तथा नेपाल–बहराइन अन्तर्राष्ट्रिय फुटबल खेलसँग सम्बन्धित प्रकरणमा अध्यक्ष नेम्बाङ, महासचिव राई, कोषाध्यक्ष रविन्द्र जोशी र लेखा अधिकृत सञ्जीव पाण्डेविरुद्ध मुद्दा अघि बढाएको हो।
नेपाल प्रहरीको केन्द्रीय अनुसन्धान ब्युरो (सीआईबी) ले गरेको अनुसन्धानमा सन् २०२४ को विश्वकप छनोटअन्तर्गत नेपाल र बहराइनबीचको खेल व्यवस्थापन, खेल सामग्री खरिद, टिकट बिक्री तथा प्रायोजन रकममा अनियमितता भएको निष्कर्ष निकालिएको थियो।
अनुसन्धान प्रतिवेदनअनुसार बहराइन फुटबल संघबाट टिकट बिक्री राजस्वबापत प्राप्त हुनुपर्ने २० हजार अमेरिकी डलर एन्फाको संस्थागत खातामा जम्मा नभएको तथा खेलका लागि बहराइनका खेलाडी र पदाधिकारीको हवाई टिकट खर्चबापत ३८ लाख ५८ हजार रुपैयाँभन्दा बढी रकम एन्फाको खातामा जम्मा भएको उल्लेख छ।
त्यस्तै, केल्मी ब्रान्डका खेल सामग्री खरिदमा बोलपत्र प्रक्रिया पालना नगरेको, खरिदमा संलग्न कम्पनीहरूको स्वामित्वमा समानता रहेको तथा फिफाबाट प्राप्त ३३० अनलाइन टिकटको वितरण र बिक्रीमा पारदर्शिता नदेखिएको पनि प्रतिवेदनमा उल्लेख छ।
मुद्दा दायर गरिएका चार जनामध्ये कोषाध्यक्ष रविन्द्र जोशी र लेखा अधिकृत सञ्जीव पाण्डे सीआईबीको नियन्त्रणमा रहेको जनाइएको छ। अध्यक्ष नेम्बाङ र महासचिव राईलाई पक्राउ गर्न अदालतबाट म्याद जारी गरिदिन सरकारी वकिल कार्यालयले अनुरोध गरेको छ।
सरकारी वकिल कार्यालयले खेलकुद विकास ऐन, २०७७ र मुलुकी अपराध संहिता, २०७४ का सम्बन्धित प्रावधानअनुसार मागदाबी गरेको हो। मुद्दा दायर हुनु आरोपको न्यायिक निरूपण भइसकेको अवस्था भने होइन।
