विराटनगर- बेलायतमा आयोजित विश्वविख्यात अन्तर्राष्ट्रिय सैन्य अभ्यास ‘एक्सरसाइज क्यामब्रियान पट्रोल २०२६’ मा नेपाली सेनाले स्वर्ण पदक जितेको छ। ३५ राष्ट्रका १३० सैन्य टोली सहभागी प्रतियोगितामा उत्कृष्ट प्रदर्शन गर्दै नेपाली सेनाले सफलता हात पारेको हो।
बेलायतको वेल्सस्थित ब्रेकनमा असोज २१ देखि २२ गतेसम्म सञ्चालन भएको प्रतियोगितामा नेपाली सेनाको टोलीलाई स्वर्ण पदक प्रदान गरिएको सैनिक जनसम्पर्क तथा सूचना निर्देशनालयले जनाएको छ। पदक वितरण समारोहमा बेलायतको औपचारिक भ्रमणमा रहेका प्रधान सेनापति अशोकराज सिग्देलसमेत उपस्थित थिए।
विश्वकै कठिन सैन्य अभ्यासमध्ये एक मानिने यस प्रतियोगितामा सहभागी टोलीले करिब ७० पाउन्ड तौल बराबरका युद्ध सामग्री र उपकरण बोकेर दुई दिनभित्र ४० माइल दूरी पार गर्नुपर्ने हुन्छ। यस क्रममा हतियार सञ्चालन, रणनीतिक सूचना सङ्कलन तथा युद्धमैदानमा घाइते र बिरामीको उद्धार र व्यवस्थापनजस्ता सैनिक सीपको परीक्षण गरिन्छ।
नेपाली सेनाले सन् २०१४ देखि यस प्रतियोगितामा सहभागिता जनाउँदै आएको छ। यसअघि सन् २०१७, २०१९, २०२४ र २०२५ मा स्वर्ण पदक जितेको नेपाली सेनाले यसपटकको सफलतासँगै प्रतियोगितामा पाँचौँ स्वर्ण पदक हासिल गरेको छ।
