विराटनगर । दुहबी नगरपालिकाले आर्थिक वर्ष २०८२/०८३ मा सञ्चालन तथा सम्पन्न गरेका स्वास्थ्यसम्बन्धी कार्यक्रमको पालिकास्तरीय वार्षिक समीक्षा सुरु गरेको छ।
नगरपालिकाको सभाहलमा असोज १५ र १६ गते सञ्चालन हुने समीक्षा कार्यक्रममा नगर स्वास्थ्य शाखा, स्वास्थ्य चौकी तथा आधारभूत स्वास्थ्य सेवा केन्द्रमार्फत सञ्चालित कार्यक्रमहरूको समीक्षा भइरहेको छ।
नगरपालिकाका प्रमुख प्रशासकीय अधिकृत सुवर्ण घिमिरेको अध्यक्षतामा सुरु भएको कार्यक्रममा नगरपालिकाअन्तर्गतका १२ वटै स्वास्थ्य संस्थाका प्रमुख, स्वास्थ्य शाखा प्रमुख बिन्देश्वरप्रसाद महतो, उचितनारायण साहलगायत विभिन्न वडाका जनप्रतिनिधि तथा स्वास्थ्यकर्मीहरूको उपस्थिति रहेको छ।
कार्यक्रमलाई सम्बोधन गर्दै प्रमुख प्रशासकीय अधिकृत घिमिरेले सीमित स्रोतसाधनका बाबजुद नागरिकका आवश्यकता पूरा गर्न स्वास्थ्यकर्मीहरूले प्रभावकारी सेवा प्रवाह गरेको भन्दै सबै स्वास्थ्य संस्थालाई धन्यवाद दिए।
स्वास्थ्य शाखा प्रमुख महतोले प्रस्तुत गरेको विवरणअनुसार समीक्षा कार्यक्रममा आर्थिक वर्ष २०८२/०८३ मा सञ्चालित स्वास्थ्य कार्यक्रमको अवस्था, उपलब्धि तथा सेवा प्रवाहका क्रममा देखिएका समस्याबारे छलफल भइरहेको छ। साथै आगामी दिनमा स्वास्थ्य सेवाको प्रभावकारिता बढाउने उपायबारे पनि समीक्षा गरिने जनाइएको छ।
वार्षिक समीक्षामार्फत नगरपालिकाभित्र सञ्चालित स्वास्थ्य कार्यक्रमको कार्यान्वयन अवस्था पहिचान गर्नुका साथै सेवा प्रवाहमा देखिएका कमजोरी, सुधार गर्नुपर्ने पक्ष र आगामी कार्यक्रमलाई थप व्यवस्थित बनाउने विषयमा निष्कर्ष निकाल्ने लक्ष्य राखिएको छ।
स्वास्थ्य शाखा प्रमुख महतोले समीक्षा कार्यक्रमबाट प्राप्त सुझाव तथा सिकाइलाई आगामी योजना र कार्ययोजनामा समेट्दै स्वास्थ्य सेवाको पहुँच र गुणस्तर थप सुदृढ बनाउने बताएका छन्।
