काठमाडौं । पूर्वप्रधानन्यायाधीश चोलेन्द्र शमशेर जबरालाई भेट्न प्रहरीले अनुमति नदिएपछि राष्ट्रिय मानव अधिकार आयोगको टोली फर्किएको छ।
आयोगको टोली जबरालाई भेट्न अपराध अनुसन्धान कार्यालय, टेकु पुगेको थियो। कार्यालयको गेटमा करिब ४५ मिनेटसम्म प्रतीक्षा गरे पनि प्रहरीले भेट्न नदिएपछि टोली त्यहाँबाट फर्किएको हो।
प्रहरीको अपराध अनुसन्धान कार्यालयको टोलीले गएराति महाराजगञ्जस्थित निवासबाट जबरालाई नियन्त्रणमा लिएर टेकुस्थित कार्यालयमा ल्याएको थियो। अहिले उनलाई अपराध अनुसन्धान कार्यालयका एसएसपी सन्तोष खड्काको कार्यकक्षमा राखिएको बताइएको छ।
एसएसपी खड्काले जबरालाई सुरक्षा थ्रेट रहेको जानकारी पाएपछि रातारात कार्यालयमा ल्याएर राखिएको बताएका छन्। उनका अनुसार राति नै कुनै अप्रिय घटना हुन सक्ने जोखिमका कारण जबरालाई कार्यालयमा ल्याइएको हो।
जबरालाई नियन्त्रणमा लिँदा अदालतबाट पक्राउ पुर्जी लिइएको थियो वा थिएन भन्ने विषयमा पनि प्रश्न उठेको छ। सम्बद्ध स्रोतका अनुसार उनलाई नियन्त्रणमा लिनुअघि अदालतबाट पक्राउ पुर्जी नलिइएको जनाइएको छ।
यसैबीच, मानव अधिकार आयोगको टोलीलाई समेत भेट्न नदिइएको घटनाले जबरालाई राखिएको स्थान र उनको अवस्थाबारे थप चासो बढाएको छ। आयोगले भेट्न खोज्नुको उद्देश्य र प्रहरीबाट भएको अवरोधबारे थप प्रक्रिया अघि बढाउने विषयमा भने स्पष्ट विवरण सार्वजनिक भइसकेको छैन।
