विराटनगर । जल तथा मौसम विज्ञान विभागअन्तर्गतको बाढी पूर्वानुमान महाशाखाले आइतबार देशभरका नदी तथा खोलामा पानीको बहाव उच्च रहने जनाउँदै उच्च सतर्कता अपनाउन आग्रह गरेको छ।
काठमाडौं उपत्यकाका तीनै जिल्लासहित उपत्यकाबाहिरका उपत्यका, मधेस र पहाडी भेगका ३४ भन्दा बढी जिल्ला भएर बहने साना नदीहरूमा आकस्मिक बाढीको मध्यम जोखिम रहेको छ।
यस्तै, गण्डकी र लुम्बिनी प्रदेशका धेरैजसो जिल्ला तथा बागमतीका केही जिल्लासहित १७ जिल्ला भएर बहने साना नदीहरूमा आकस्मिक बाढीको उच्च जोखिम रहेको छ।
यसैगरी, कोशी, नारायणी र तिनका सहायक नदीहरूमा जलसतह सतर्कता तह माथि पुगेको छ।
महाशाखाले नारायणी नदीका बुढीगण्डकी, मर्स्याङ्दी, सेती, माडी, बडिगाड र कालीगण्डकीमा पानीको बहाव उल्लेख्य बढ्ने पूर्वानुमान गरेको छ।
