स्याङ्जा । जिल्ला प्रशासन कार्यालय स्याङ्जाबाट जारी भएको नागरिकताको सरकारी अभिलेखमा किर्ते तथा अनधिकृत हेरफेर गरेको आरोपमा तीन कर्मचारीमाथि छानबिन अघि बढाइएको छ।
प्रमुख जिल्ला अधिकारी निराजन घिमिरेका अनुसार प्रशासकीय अधिकृत सूर्यप्रसाद शर्मा, लेखापाल रमेश बिक र कम्प्युटर अपरेटर विष्णुप्रसाद चापागाईंमाथि अनुसन्धान अघि बढाइएको हो।
उनीहरूको भूमिकाबारे अनुसन्धान गरी आवश्यक कारबाहीका लागि जिल्ला प्रशासन कार्यालयले प्रहरी कार्यालयलाई पत्राचार गरेको प्रमुख जिल्ला अधिकारी घिमिरेले जानकारी दिए।
जिल्ला प्रशासन कार्यालय कास्कीमा दुई बालबालिकाको नाबालक परिचयपत्र बनाउन पेस गरिएका कागजात रुजु गर्ने क्रममा उनीहरूका बुबाको नाममा दुईवटा नागरिकता रहेको भेटिएपछि घटना बाहिर आएको हो।
अभिलेखअनुसार ती व्यक्तिले २०५६ चैत ३ गते तत्कालीन आरुखर्क–८, स्याङ्जालाई स्थायी ठेगाना उल्लेख गरी जिल्ला प्रशासन कार्यालय स्याङ्जाबाट नागरिकता लिएका थिए।
तर त्यसको केही महिनापछि २०५७ भदौ २५ गते पोखरा लेखनाथ महानगरपालिका–७, कास्कीलाई स्थायी ठेगाना उल्लेख गरी कास्कीबाट समेत अर्को नागरिकता लिएको देखिएको छ।
दुईवटा नागरिकता जारी भएको विषयमा स्याङ्जा प्रशासनको सरकारी अभिलेखमा भएको भनिएको हेरफेर तथा सम्बन्धित कर्मचारीको भूमिकाबारे प्रहरीले थप अनुसन्धान अघि बढाउने भएको छ।
