बुटवल । पश्चिम नवलपरासीको सुस्ता गाउँपालिकामा नारायणी नदीको बाढी पस्दा १६५ घरपरिवार प्रभावित भएका छन्। नदीको जलसतह निरन्तर बढिरहेका कारण सुस्ताका अन्य बस्तीसमेत उच्च जोखिममा परेका छन्।
सुस्ता गाउँपालिका–५ को थारु टोलबाट शुक्रबारदेखि बस्तीमा पस्न थालेको बाढीका कारण ७८ घरपरिवारलाई शुक्रबार दिउँसो नै सुस्तामा निर्माण गरिएको होल्डिङ सेन्टरमा सारिएको थियो।
गएराति सैनिक टोल र बड्का टोलमा समेत बाढी पसेपछि थप ८५ घरपरिवारलाई सुरक्षित स्थानमा सारिएको सुस्तास्थित सशस्त्र प्रहरी बेस क्याम्पका प्रहरी उपरीक्षक गोविन्दबहादुर खातीले जानकारी दिए।
नदीमा पानीको बहाव अझै बढ्ने क्रममा रहेकाले जोखिममा रहेका परिवारलाई नारायणी नदीवारि सुरक्षित स्थानमा सार्ने तयारी भइरहेको उनले बताए। कच्ची घरमा बाढी पसेपछि अधिकांश स्थानीय समस्यामा परेका छन्।
शनिबार बिहान ७ बजे गरिएको मापनअनुसार गण्डक ब्यारेजमा नारायणी नदीको पानीको बहाव प्रतिसेकेन्ड २ लाख ६७ हजार क्युसेक पुगेको छ।
सुस्ता गाउँतर्फ नारायणी नदीले धार परिवर्तन गरेका कारण नदीमा पानीको बहाव १ लाख क्युसेक पुग्नेबित्तिकै बाढी बस्तीमा पस्ने गरेको वडा सदस्य आदम खानले बताए। नदीको जलसतह निरन्तर बढिरहेकाले सुस्ताका सबै बस्ती जोखिममा रहेको उनको भनाइ छ।
स्थानीयका अनुसार सुस्तामा निर्माणाधीन तटबन्धको काम भारतीय पक्षले रोकेपछि करिब १३२ मिटर क्षेत्रमा तटबन्ध निर्माण हुन सकेको छैन। यही क्षेत्रमा नदीले कटान गर्दै बस्तीतर्फ जोखिम बढाएको स्थानीयको भनाइ छ ।बाढीका कारण बस्तीका साथै उखु खेतीमा समेत क्षति पुगेको स्थानीयले बताएका छन्।
प्रमुख जिल्ला अधिकारी दीपकराज नेपालले जोखिममा रहेका परिवारलाई उद्धार गर्नुपर्ने अवस्था आए सुरक्षाकर्मीको टोली तयारी अवस्थामा राखिएको जानकारी दिए।
