काठमाडौं । प्रतिकूल मौसमका कारण काठमाडौंसहित देशका विभिन्न स्थानमा हवाई उडान प्रभावित भएका छन्।
त्रिभुवन अन्तर्राष्ट्रिय विमानस्थल कार्यालयका अनुसार मौसम खराब हुँदा केही विमानस्थलमा भिजिबिलिटी कम भएको छ। जसका कारण तुम्लिङटार, भरतपुर र पोखरा विमानस्थलका उडान प्रभावित भएका हुन्।
तुम्लिङटारमा बुद्ध एयरको निर्धारित उडान रद्द भएको छ भने भरतपुरका लागि बुद्ध एयरका तीनवटा उडान रद्द भइसकेका छन्।
त्यस्तै, पोखरा विमानस्थलमा पनि मौसम अनुकूल हुने प्रतीक्षामा केही उडान ढिला भएका छन्। मौसममा सुधार आएपछि मात्र उडान सञ्चालन गर्ने तयारी गरिएको छ।
अन्य गन्तव्यतर्फ भने हवाई सेवा सामान्य रूपमा सञ्चालन भइरहेको विमानस्थल कार्यालयले जनाएको छ। अन्तर्राष्ट्रिय उडानहरू पनि हाल सामान्य रूपमा सञ्चालन भइरहेका छन्।
