विराटनगर । मोरङको बुढीगंगा गाउँपालिका र विराटनगरस्थित नोबेल मेडिकल कलेज टिचिङ हस्पिटलबीच गाउँपालिकाका नागरिकलाई उपचारमा सहुलियत दिने सम्झौता भएको छ।
सम्झौताअनुसार बुढीगंगा गाउँपालिकामा बसोबास गर्ने नागरिकले नोबेल मेडिकल कलेजमा उपचार गराउँदा विभिन्न स्वास्थ्य सेवामा २० प्रतिशतसम्म छुट पाउने भएका छन्। नेपाल सरकारबाट सञ्चालित स्वास्थ्य बीमा, आमा सुरक्षा, विपन्न नागरिक औषधि उपचार कोषलगायतका सुविधा प्रयोग गरिसकेपछि अस्पतालबाट थप उपचार आवश्यक परेका बिरामीलाई यो सहुलियत उपलब्ध गराइने सम्झौतामा उल्लेख छ।
स्वास्थ्य बीमा गरेका तर बीमा सुविधा प्रयोग गरिसकेका नागरिकका साथै बीमा नगरेका वा बीमा सक्रिय हुनुअघि उपचार आवश्यक परेका बुढीगंगाका बिरामीले समेत सम्झौताअनुसारको छुट पाउने व्यवस्था गरिएको छ।
सहुलियत लिन अस्पताल पुग्ने बिरामीले बुढीगंगा गाउँपालिकाका अध्यक्ष वा गाउँपालिकाले तोकेको पदाधिकारीको सिफारिस, आफ्नो परिचय खुल्ने कागजात र नागरिकताको प्रतिलिपि बुझाउनुपर्नेछ। १६ वर्षमुनिका बालबालिकाको हकमा जन्मदर्ताको प्रतिलिपि आवश्यक पर्नेछ।
यसैगरी, बुढीगंगा गाउँपालिका अस्पताल वा स्वास्थ्य चौकीबाट थप उपचारका लागि सिफारिस भएर आउने कोशी प्रदेशका अन्य बिरामीलाई समेत सम्झौताअनुसारको उपचार सहुलियत उपलब्ध गराइने भएको छ। त्यस्ता बिरामीले सम्बन्धित स्वास्थ्य संस्थामा जाँच गराएको कागजात र थप उपचारका लागि रिफर गरिएको विवरण साथमा ल्याउनुपर्नेछ।
सम्झौताअनुसार छुट सुविधा प्रत्यक्ष स्वास्थ्य उपचारसँग सम्बन्धित सेवामा मात्र लागू हुनेछ। आईभीएफ, प्लास्टिक सर्जरी, कस्मेटिक सर्जरी, क्याबिनमा बसेर उपचार गर्दा लाग्ने खर्च तथा औषधि र चिकित्साजन्य सामग्रीमा भने यो छुट लागू नहुने उल्लेख छ।
यो सम्झौता २०८३ साल साउन २२ गतेदेखि २०८४ साल असार मसान्तसम्म लागू हुने जनाइएको छ। दुवै पक्षको सहमतिमा सम्झौताका बुँदा परिमार्जन गर्न तथा सम्झौतालाई निरन्तरता दिन सकिने व्यवस्था पनि गरिएको छ।
गाउँपालिका र नोबेल मेडिकल कलेजबीच भएको यो सम्झौताले आर्थिक रूपमा कमजोर तथा उपचारका लागि विराटनगर आउने बुढीगंगाका नागरिकलाई निजी अस्पतालमा उपचार गराउँदा केही आर्थिक राहत पुग्ने अपेक्षा गरिएको छ।
