बैंकक । थाइल्यान्डको राजधानी बैंककमा १४ वर्षीय किशोरले गोली चलाउँदा आठ जनाको मृत्यु भएको छ भने २२ जना घाइते भएका छन्।
प्रहरीका अनुसार किशोरले शुक्रबार बिहान आफू बस्दै आएको घरमा ७३ वर्षीय हजुरबुबा र ७४ वर्षीया हजुरआमालाई गोली हानेर हत्या गरेका थिए। त्यसपछि उनी बन्दुक र गोली बोकेर विद्यालय पुगेका थिए।
देब्सिरिन विद्यालयमा पुगेपछि उनले शिक्षकहरूमाथि गोली चलाएका थिए। गोली लागेर पाँच शिक्षकको मृत्यु भएको छ भने घाइते भएका एक विद्यार्थीको उपचारका क्रममा मृत्यु भएको स्थानीय सञ्चारमाध्यमले जनाएका छन्।
प्रहरीका अनुसार किशोरले विद्यालयको छैटौँ तलामा रहेका शिक्षकहरूमाथि गोली चलाएका थिए। त्यस क्रममा तीन शिक्षकको मृत्यु भएको थियो। त्यसपछि भर्याङबाट तल झर्ने क्रममा भेटिएका थप दुई जनामाथि पनि उनले गोली चलाएको प्रहरीले जनाएको छ।
गोली चलेपछि प्रहरीले विद्यालयमा सुरक्षा कारबाही अघि बढाएको थियो। बिहान करिब १०ः४० बजे किशोरलाई आफैंलाई गोली हानेको अवस्थामा फेला पारिएको प्रहरीले जनाएको छ।
प्रहरीका अनुसार आक्रमणमा प्रयोग गरिएको बन्दुक र गोली किशोरकै हजुरबुबाको थियो। स्थानीय तथा अन्तर्राष्ट्रिय सञ्चारमाध्यमका अनुसार उक्त बन्दुक कानुनी रूपमा दर्ता भएको र त्यसका लागि अनुमति लिइएको थियो।
