तेह्रथुम । जेनजी आन्दोलनका क्रममा सुनसरीको झुम्का कारागारबाट फरार भएका कर्तव्य ज्यान मुद्दाका एक कैदीलाई प्रहरीले तेह्रथुमबाट पक्राउ गरेको छ।
पक्राउ पर्नेमा तेह्रथुमको लालिगुराँस नगरपालिका–८ सोल्माका ३५ वर्षीय छत्रबहादुर नेपाली रहेका छन्। जिल्ला अदालत तेह्रथुमले उनलाई कर्तव्य ज्यान मुद्दामा २० वर्ष कैद सजाय सुनाएको थियो। उनी ९ वर्ष कैद भुक्तान गर्न बाँकी रहँदा झुम्का कारागारमा सजाय काटिरहेका थिए।
प्रहरीका अनुसार नेपाली २०८२ साल भदौ २३ र २४ गते भएको जेनजी आन्दोलनका क्रममा कारागारबाट फरार भएका थिए। फरारपछि आफ्नै घरमा लुकीछिपी बसेको भन्ने गोप्य सूचनाका आधारमा इलाका प्रहरी कार्यालय बसन्तपुरबाट प्रहरी निरीक्षक रुपेश तामाङको नेतृत्वमा खटिएको टोलीले साउन २१ गते राति करिब २ बजे उनलाई घरबाट पक्राउ गरेको हो।
