विराटनगर । जीवन विकास सामुदायिक अस्पताल तथा टेक्निकल एजुकेशन फाउन्डेसनको आयोजनामा मोरङमा रक्तदान कार्यक्रम सम्पन्न भएको छ। अस्पताल परिसरमा आयोजित कार्यक्रममा ५४ युनिट रगत संकलन भएको आयोजकले जनाएको छ।
रक्तको अभावमा उपचारमा समस्या नहोस् भन्ने उद्देश्यले आयोजित कार्यक्रममा जीवन विकास लघुवित्त वित्तीय संस्था लिमिटेडका कर्मचारी, जीवन विकास सामुदायिक अस्पतालका कर्मचारी, सेवाग्राही तथा सर्वसाधारणले उत्साहजनक रूपमा रक्तदान गरेका थिए।
आयोजकका अनुसार संकलित रगत आवश्यक पर्ने बिरामीहरूको उपचारमा उपयोग गरिनेछ। साथै, रक्तदानप्रति जनचेतना अभिवृद्धि गर्न र समाजमा मानवीय सेवाको भावना विस्तार गर्न कार्यक्रमले महत्वपूर्ण योगदान पुर्याएको विश्वास व्यक्त गरिएको छ।
जीवन विकास सामुदायिक अस्पताल तथा टेक्निकल एजुकेशन फाउन्डेसनले रक्तदान गर्ने सम्पूर्ण रक्तदाताप्रति आभार व्यक्त गर्दै आगामी दिनमा पनि यस्ता सामाजिक तथा मानवीय कार्यक्रमलाई निरन्तरता दिने जनाएको छ।
