विराटनगर । जिल्ला प्रशासन कार्यालय मोरङले मन्दिर, मस्जिद, चर्च, गुम्बा लगायत सबै धार्मिक स्थलहरूमा चर्को आवाजमा लाउडस्पीकर, माइक तथा साउण्ड बक्स प्रयोग नगर्न निर्देशन दिएको छ।
बिहीबार सार्वजनिक गरिएको सूचनामा विभिन्न धर्मावलम्बीहरूले धार्मिक गतिविधि सञ्चालनका क्रममा उच्च ध्वनि प्रयोग गर्दा जनस्वास्थ्यमा नकारात्मक असर परेको भन्दै प्राप्त गुनासोका आधारमा ध्वनि प्रदूषणसम्बन्धी मापदण्ड कडाइका साथ पालना गर्न आग्रह गरिएको हो।
प्रशासनका अनुसार अत्यधिक आवाजका कारण घरमा रहेका बालबालिका, वृद्धवृद्धा तथा बिरामीहरूको स्वास्थ्यमा प्रतिकूल असर पर्ने, मानसिक तनाव र दीर्घरोगको जोखिम बढ्ने भएकाले यस्तो निर्णय गरिएको हो।
यो निर्देशन सर्वोच्च अदालतको २०८० पुस १६ गतेको फैसला तथा नेपाल राजपत्रमा प्रकाशित ध्वनि प्रदूषणसम्बन्धी मापदण्डका आधारमा जारी गरिएको प्रशासनले जनाएको छ।
सरकारले निर्धारण गरेको ध्वनि मापदण्डअनुसार ग्रामीण क्षेत्रमा दिउँसो ४५ डेसिबल र राति ४० डेसिबलसम्म तथा शहरी आवासीय क्षेत्रमा दिउँसो ५५ डेसिबल र राति ५० डेसिबलसम्म मात्र ध्वनि प्रयोग गर्न पाइने व्यवस्था छ।
यसअघि पनि जिल्ला प्रशासन कार्यालय मोरङले सार्वजनिक कार्यक्रमहरूमा डिजे प्रयोगमा रोक लगाएको थियो।
पछिल्लो निर्देशनसँगै धार्मिक स्थलहरूलाई पनि कानुनले तोकेको ध्वनि मापदण्डको पूर्ण पालना गर्न प्रशासनले आग्रह गरेको छ।
