सन्सुसरी । सुनसरीको देवानगञ्ज गाउँपालिका–३ कप्तानगञ्जमा दुई पक्षीय युवा समूहबीच सुरु भएको विवाद हिंसात्मक बनेपछि उत्पन्न तनाव साम्य पार्ने प्रयास भइरहेका बेला मंगलबार साँझ फेरि दुई पक्षबीच भिडन्त भएको छ।
दिनभर हिन्दु पक्षले प्रदर्शन जारी राखे पनि साँझतिर मुस्लिम पक्ष पनि प्रदर्शनमा उत्रिएपछि दुवै पक्ष रड, भाला, खुँडा, तरबारलगायतका घरेलु हतियारसहित आमनेसामने भएका हुन्। आक्रमण र प्रत्याक्रमण भएपछि क्षेत्रको सुरक्षा अवस्था थप चुनौतीपूर्ण बनेको छ।
सुनसरी प्रहरीका सूचना अधिकारी डीएसपी चन्द्रबहादुर खड्काका अनुसार साँझ करिब ७ बजेदेखि दुवै पक्षका समूह एकअर्काविरुद्ध उत्रिएका हुन्। स्थिति नियन्त्रणमा लिन नेपाल प्रहरी, सशस्त्र प्रहरी र अन्य सुरक्षा निकायका ठूलो संख्यामा सुरक्षाकर्मी परिचालन गरिएको छ। उनका अनुसार दुवै पक्ष अहिले पनि छुट्टाछुट्टै समूह बनाएर बसिरहेका छन्।
यसअघि आइतबार राति भएको झडपका क्रममा प्रहरीको गोली लागेर देवानगञ्ज गाउँपालिका–४ का २५ वर्षीय ओमप्रकाश मेहताको मृत्यु भएको थियो। उक्त घटनामा कम्तीमा २१ जना घाइते भएका थिए, जसमध्ये दुई जनाको अवस्था गम्भीर रहेको छ।
घटनापछि देवानगञ्ज क्षेत्रमा सुरक्षा व्यवस्था कडा पारिएको भए पनि अवस्था पूर्ण रूपमा सामान्य हुन सकेको छैन। स्थानीय प्रशासनले शान्ति र संयम अपनाउन सबै पक्षसँग आग्रह गर्दै परिस्थितिलाई नियन्त्रणमा लिन प्रयास जारी राखेको जनाएको छ।
