विराटनगर । देवानगञ्जमा भएको घटनापछि उत्पन्न तनावका कारण सुनसरीका विभिन्न क्षेत्रमा प्रदर्शन चर्किएपछि प्रशासनले मुख्य राजमार्ग क्षेत्र र इनरुवा बजार क्षेत्रमा अनिश्चितकालीन कर्फ्यू आदेश जारी गरेको छ।
देवानगञ्ज क्षेत्रमा दुई समुदायबीच भएको झडपका क्रममा सशस्त्र प्रहरीले गोली चलाउँदा एकजनाको मृत्यु भएपछि घटनाको विरोधमा प्रदर्शन सुरु भएको हो।
प्रदर्शनका क्रममा तोडफोड र आगजनीका घटना भएपछि जिल्ला प्रशासन कार्यालय सुनसरीले सुरक्षा अवस्थालाई मध्यनजर गर्दै कर्फ्यू आदेश जारी गरेको जनाएको छ।
प्रशासनका अनुसार सुनसरीको पकलीदेखि कोशी ब्यारेजसम्मको मुख्य राजमार्ग क्षेत्रमा अर्को सूचना जारी नभएसम्मका लागि कर्फ्यू लागू गरिएको छ।
प्रशासनले अर्को सूचना जारी नभएसम्म आवतजावत, भेला, जुलुस र प्रदर्शनमा रोक लगाएको जनाएको छ।
