सुनसरी । सुनसरीको देवानगञ्ज गाउँपालिका–३ कप्तानगञ्जमा भएको हिंसात्मक घटनापछि कोशी कटान क्षेत्रको अवस्था थप तनावग्रस्त बनेको छ। स्थानीय प्रशासनले मंगलबार पनि कर्फ्यु आदेशलाई निरन्तरता दिएको भए पनि विभिन्न स्थानमा प्रदर्शन, लुटपाट, तोडफोड र आगजनीका घटना भएका छन्।
प्रदर्शनकारीहरूले कोशी कटान क्षेत्रका पसलहरूमा लुटपाट र तोडफोड गर्नुका साथै आगजनी गरेका छन्। यस्तै, पूर्व–पश्चिम राजमार्गको सुनसरी खण्डका विभिन्न स्थानमा टायर बालेर सडक अवरुद्ध गरिएको छ। घटनास्थलमा नेपाल प्रहरी र सशस्त्र प्रहरी परिचालन गरिएको छ भने सुरक्षा व्यवस्था कडा पारिएको छ।
आइतबार कप्तानगञ्जमा दुई समूहबीच भएको झडप नियन्त्रणका क्रममा प्रहरीले चलाएको गोली लागेर एक जनाको मृत्यु भएको थियो भने ९ जना सर्वसाधारण घाइते भएका थिए। घटनापछि स्थानीय प्रशासनले दक्षिणी क्षेत्रका पाँच स्थानमा कर्फ्यु आदेश जारी गरेको थियो। तर कर्फ्यु उल्लङ्घन गर्दै सोमबार दिनभर प्रदर्शन जारी रहेपछि प्रशासनले मंगलबार पनि कर्फ्युलाई यथावत् राखेको हो।
प्रमुख जिल्ला अधिकारी ईश्वरीप्रसाद अर्यालद्वारा जारी आदेशअनुसार मंगलबार बिहान ७ बजेदेखि साँझ ७ बजेसम्म देवानगञ्ज गाउँपालिका र हरिनगर गाउँपालिकाका सम्पूर्ण क्षेत्रमा निषेधाज्ञा लागू गरिएको छ। हरिनगरा, भुटाहा, कप्तानगञ्ज, घुस्की र देवानगञ्ज बजार क्षेत्रमा कर्फ्यु आदेश कायम रहेको प्रशासनले जनाएको छ।
प्रशासनले सर्वसाधारणलाई कर्फ्यु आदेशको पालना गर्न आग्रह गर्दै शान्ति–सुरक्षा कायम गर्न सुरक्षा निकायलाई उच्च सतर्कतामा राखिएको जनाएको छ।
