सुनसरी ।सुनसरीको देवानगञ्जमा दुई समुदायबीच भएको हिंसात्मक झडप र त्यसपछि प्रहरीले गोली चलाउँदा एक जनाको ज्यान गएको घटनामा राष्ट्रिय मानव अधिकार आयोगले औपचारिक रूपमा अनुसन्धान थालेको छ। घटनालाई गम्भीर मानव अधिकारको विषयका रूपमा लिँदै आयोगले प्रारम्भिक तथ्य संकलन सुरु गरेको हो।
आयोगका प्रवक्ता डा. टीकाराम पोखरेलका अनुसार कोशी प्रदेश कार्यालय, विराटनगरको टोलीले घटनास्थल पुगेर प्रमुख जिल्ला अधिकारी, प्रहरी अधिकारी, अस्पताल प्रशासन तथा स्थानीयसँग छलफल गर्दै घटनाको वास्तविकता बुझिरहेको छ।
आयोगको प्रारम्भिक अनुगमनमा पोलमा झण्डा राख्ने विषयबाट सुरु भएको विवाद डिजे बजाउने क्रममा चर्किँदै दुई समुदायबीच हिंसात्मक झडपमा परिणत भएको देखिएको छ। स्थिति नियन्त्रणमा लिन प्रहरीले गोली चलाउँदा ओमप्रकाश मेहताको मृत्यु भएको तथा ९ जना घाइते भएको आयोगले जनाएको छ। घाइतेमध्ये दुई जनाको अवस्था गम्भीर रहेको उल्लेख गरिएको छ।
हाल चार जनाको न्युरो अस्पताल, चार जनाको विराट नर्सिङ होम र एक जनाको नोबेल मेडिकल कलेजमा उपचार भइरहेको आयोगले जानकारी दिएको छ।
घटनापछि बिग्रिएको शान्ति–सुरक्षा अवस्थाप्रति चिन्ता व्यक्त गर्दै आयोगले निष्पक्ष अनुसन्धान गरी दोषीलाई कानुनी दायरामा ल्याउन, मृतकका परिवारलाई राहत तथा क्षतिपूर्ति उपलब्ध गराउन र घाइतेको निःशुल्क तथा प्रभावकारी उपचार सुनिश्चित गर्न सरकारलाई निर्देशन दिएको छ।
आयोगले राजनीतिक दल, नागरिक समाज, मानव अधिकारकर्मी र सर्वसाधारणलाई पनि संयमता अपनाउँदै संवाद र सहमतिमार्फत विवाद समाधान गरी सामाजिक सद्भाव कायम राख्न सहयोग गर्न अपिल गरेको छ।
