विराटनगर- मोरङको विराटनगर महानगरपालिका-१४ जतुवाबाट कटुवा पिस्तोल, गोली, गाँजा र घरेलु हतियारसहित एक जना पक्राउ परेका छन्।
आइतबार बिहान करिब ५:५० बजे सशस्त्र प्रहरी बलको विशेष सूचनाका आधारमा सीमा सुरक्षा गुल्म मुख्यालय रानीबाट सशस्त्र प्रहरी सहायक निरीक्षक गणेश खत्रीको नेतृत्वमा खटिएको ९ सदस्यीय मोबाइल गस्ती टोलीले जतुवास्थित मुन्ना सहनीको घरमा भाडामा बस्दै आएका ३१ वर्षीय सुभासचन्द्र यादवको कोठामा खानतलासी गरेको थियो।
खानतलासीका क्रममा यादवको कोठाबाट एक थान कटुवा पिस्तोल, त्यसको एक राउण्ड गोली, एक थान घरेलु हतियार (भाला), १४० ग्राम प्रतिबन्धित लागुऔषध गाँजा, पोको कम्पनीका दुई थान मोबाइल फोन तथा नगद ४ हजार ५०० रुपैयाँ बरामद भएको सशस्त्र प्रहरीले जनाएको छ।
बरामद सामग्रीसहित यादवलाई नियन्त्रणमा लिएर थप अनुसन्धानका लागि बिहान इलाका प्रहरी कार्यालय रानीमा बुझाइएको प्रहरीले जनाएको छ।
