विराटनगर । नेपाल प्रहरीले २०६८ सालदेखि सुरु गरेको मादक पदार्थ सेवन (मापसे) नियन्त्रण अभियानले मदिरा सेवन गरेर सवारी चलाउने प्रवृत्ति र त्यससँग सम्बन्धित दुर्घटनामा उल्लेखनीय कमी ल्याएको देखिएको छ।
ट्राफिक प्रहरीका अनुसार अभियानपछि मापसेका कारण हुने दुर्घटना ९० प्रतिशतभन्दा बढी घटेको दाबी गरिएको छ भने चिकित्सकहरूले गम्भीर टाउको चोटका बिरामी ७०–८० प्रतिशतसम्म घटेको अनुभव सुनाएका छन्।
प्रहरीको तथ्यांकअनुसार आर्थिक वर्ष २०६९/७० देखि चालु आर्थिक वर्ष २०८२/८३ को जेठसम्म ७ लाख ६७ हजारभन्दा बढी चालक मापसे कसुरमा कारबाहीमा परेका छन्।
यसबाट ७१ करोड ४४ लाख रुपैयाँभन्दा बढी राजस्व संकलन भएको छ। यद्यपि, अझै पनि दैनिक १५० देखि २०० जना चालक मापसे गरेर सवारी चलाएको अवस्थामा कारबाहीमा पर्ने गरेका छन्।
सरकारले मापसे गर्ने चालकलाई सवारीको प्रकृतिअनुसार २५ हजारदेखि ५० हजार रुपैयाँसम्म जरिवाना गर्ने कानुनी व्यवस्था ल्याउने तयारी गरेको छ।
विज्ञहरूले भने मापसे नियन्त्रण मात्र पर्याप्त नभई अत्यधिक गति, मोबाइल प्रयोग, कमजोर सडक पूर्वाधार, प्रभावकारी उद्धार प्रणाली र समयमै उपचारमा पनि सुधार आवश्यक रहेको बताएका छन्।
