विराटनगर । बर्जु गाउँपालिका वडा नं. २ ले महिला तथा युवालाई आत्मनिर्भर बनाउने उद्देश्यका साथ अचार बनाउने तालिम र उद्यमशीलता तालिम सम्पन्न गरेको छ। वडाले स्थानीय स्तरमै सीप विकास गरी स्वरोजगार र उद्यमशीलतालाई प्रवर्द्धन गर्ने लक्ष्यसहित दुवै कार्यक्रम सञ्चालन गरेको हो।
महिलाहरूका लागि आयोजित ५ दिने अचार बनाउने तालिममा २१ जना महिलाको सहभागिता रहेको थियो। तालिममा इनरुवाकी सुशिला श्रेष्ठले सहजीकरण गर्दै च्याउको अचार, मेथीको अचार लगायत विभिन्न प्रकारका अचार बनाउने व्यावहारिक सीप प्रदान गरेकी थिइन्।
तालिम समापन कार्यक्रममा बर्जु गाउँपालिका – २ का वडा अध्यक्ष महेन्द्र प्रसाद कामतले सहभागीलाई प्रमाणपत्र वितरण गर्दै तालिममा सिकेका सीपलाई व्यवहारमा उतारेर आयआर्जनसँग जोडिन आग्रह गरे। उनले आगामी आर्थिक वर्षको बजेटमार्फत पनि महिलालाई आत्मनिर्भर बनाउने यस्ता सीपमूलक कार्यक्रमलाई निरन्तरता दिने प्रतिबद्धता व्यक्त गरे।
त्यसैगरी, वैदेशिक रोजगारीबाट फर्किएका युवालाई लक्षित गरी उद्यमशीलता विकास तालिम पनि सञ्चालन गरिएको थियो। २० जना युवाको सहभागिता रहेको उक्त तालिममा रमेश कुमार चौधरीले सहजीकरण गरेका थिए।
गाउँपालिका अध्यक्ष कामतले वैदेशिक रोजगारीबाट फर्किएका युवाले विदेशमा सिकेको अनुभव र सीपलाई स्वदेशमै सदुपयोग गर्दै आफ्नै गाउँठाउँमा रोजगारी सिर्जना गर्न सकून् भन्ने उद्देश्यले उद्यमशीलता तालिम सञ्चालन गरिएको बताए। उनले युवालाई स्वरोजगार र उत्पादनमूलक क्षेत्रमा आकर्षित गर्न गाउँपालिका निरन्तर रूपमा यस्ता कार्यक्रम सञ्चालन गर्ने पनि जानकारी दिए।
वडाले सञ्चालन गरेका यी तालिमहरूले महिलालाई आयआर्जनमा जोड्नुका साथै वैदेशिक रोजगारीबाट फर्किएका युवालाई स्वदेशमै उद्यम सञ्चालन गर्न प्रेरित गर्ने विश्वास लिइएको छ। स्थानीय तहको यस्ता सीपमूलक कार्यक्रमले आर्थिक सशक्तीकरण र रोजगारी सिर्जनामा महत्वपूर्ण योगदान पुग्ने अपेक्षा गरिएको छ।
