सुनसरी । सुनसरीको भोक्राहा नरसिंह गाउँपालिकाका विभिन्न विद्यालयहरूमा विद्यार्थीलाई लक्षित गर्दै लागुऔषधविरुद्ध सचेतनामूलक कार्यक्रम गरिएको छ ।
समाज विकास केन्द्र, नेपालले गाउँपालिकाका सामुदायिक विद्यालयहरूमा लागुऔषध नियन्त्रण तथा दुर्व्यसनविरुद्धको जनचेतनामूलक कार्यक्रम आयोजना गरेको हो ।
कोशी प्रदेश सरकारका उद्योग, कृषि तथा सहकारी मन्त्री इस्राईल मन्सुरीको प्रमुख आतिथ्यतामा आयोजित कार्यक्रममा विद्यार्थी, शिक्षक, अभिभावक तथा सरोकारवाला निकायका प्रतिनिधिहरूको सहभागिता रहेको थियो ।
कार्यक्रममा लागुऔषध दुर्व्यसनले व्यक्ति, परिवार र समाजमा पार्ने नकारात्मक प्रभावबारे जानकारी गराइएको थियो ।
साथै पछिल्लो समय युवापुस्तामा बढ्दो लागुऔषध प्रयोगको जोखिम, त्यसबाट उत्पन्न हुने स्वास्थ्य, सामाजिक तथा आर्थिक समस्याका विषयमा समेत सचेतना फैलाइएको आयोजकले जनाएको छ।
प्रमुख अतिथि मन्त्री मन्सुरीले समाजलाई लागुऔषधमुक्त बनाउन विद्यालयस्तरबाटै सचेतना अभियान सञ्चालन गर्नु आवश्यक रहेको बताए ।
उनले युवाहरूलाई कुलतबाट जोगाउन परिवार, विद्यालय, समुदाय तथा सरोकारवाला निकायबीच समन्वय र सहकार्य अपरिहार्य रहेको उल्लेख गरे।
कार्यक्रममा सहभागी विद्यार्थीहरूलाई लागुऔषध दुर्व्यसनबाट टाढा रहन, स्वस्थ जीवनशैली अपनाउन तथा समाजमा सकारात्मक सन्देश प्रवाह गर्न आग्रह गरिएको थियो ।
विभिन्न सचेतनामूलक प्रस्तुति, अन्तरक्रिया तथा जानकारीमूलक सत्रमार्फत लागुऔषध नियन्त्रणका उपायहरूबारे जानकारी प्रदान गरिएको थियो ।
समाज विकास केन्द्र, नेपालले विद्यालय केन्द्रित यस्ता कार्यक्रममार्फत किशोर–किशोरी तथा युवाहरूलाई लागुऔषध दुर्व्यसनको जोखिमबाट जोगाउन र सचेत समाज निर्माणमा योगदान पुर्याउने उद्देश्यले अभियान सञ्चालन गर्दै आएको जनाएको छ ।
