विराटनगर । नेपाल-भारत सीमापार रेलवे परियोजनासम्बन्धी उच्चस्तरीय बैठक सम्पन्न भएको छ।
भारतीय दूतावासका अनुसार जेठ २८ र २९ गते आयोजित १०औँ परियोजना निर्देशक समिति र ८औँ संयुक्त कार्यदल बैठकमा सञ्चालनमा रहेका तथा प्रस्तावित रेल परियोजनाहरूको प्रगति समीक्षा गरिएको हो।
बैठकमा भारत सरकारको अनुदान सहयोगमा निर्माणाधीन जयनगर–विजलपुरा–बर्दिबास र जोगबनी–विराटनगर ब्रोडगेज रेलमार्गको कार्यान्वयन अवस्थाबारे छलफल भएको थियो।
साथै सीमापार रेल सेवा विस्तार, द्विपक्षीय सहकार्य सुदृढीकरण तथा रक्सौल–काठमाडौं रेल लिंकको अन्तिम सर्वेक्षण प्रतिवेदनबारे पनि विचार–विमर्श गरिएको दूतावासले जनाएको छ।
त्यस्तै जनकपुर–अयोध्या यात्रु रेल सेवा सञ्चालन प्रक्रिया, पूर्व–पश्चिम रेलमार्गका लागि प्राविधिक सहयोग र थप सीमापार रेल परियोजनाको सम्भावनाबारे पनि छलफल भएको थियो।
भारतीय पक्षको नेतृत्व विदेश मन्त्रालयका सहसचिव रोहित रथीश र रेल मन्त्रालयका कार्यकारी निर्देशक प्रदीप ओझाले गरेका थिए ।
नेपाली पक्षको नेतृत्व भौतिक पूर्वाधार तथा यातायात मन्त्रालयका सहसचिव सुशील बाबु ढकालले गरेका थिए।
