विराटनगर । दुहबी नगरपालिकाले जलवायु परिवर्तनको प्रभावबाट जोखिममा परेका नगरभित्रका १२९ घरपरिवारलाई सुधारिएको फलामे चुलो वितरण गरेको छ।
नगरप्रमुख बेदनारायण गच्छादारले एक कार्यक्रमका बीच तीन लेयरयुक्त सुधारिएको फलामे चुलो लाभग्राही परिवारलाई हस्तान्तरण गरेका हुन्।
परम्परागत रूपमा प्रयोग हुँदै आएका दाउरा, गुइँठा लगायतका इन्धनको खपत घटाउँदै वातावरणीय प्रदूषण न्यूनीकरण गर्ने तथा जलवायु परिवर्तनबाट प्रभावित समुदायको जीवनस्तर सुधार गर्ने उद्देश्यले चुलो वितरण गरिएको नगरपालिकाले जनाएको छ।
उक्त कार्यक्रम वैकल्पिक ऊर्जा प्रवर्द्धन केन्द्रको ८० प्रतिशत अनुदान, दुहबी नगरपालिकाको १५ प्रतिशत अनुदान तथा सेवाग्राहीको ५ प्रतिशत साझेदारीमा सञ्चालन गरिएको हो।
नगरप्रमुख गच्छादारले सुधारिएको चुलोको प्रयोगले इन्धनको बचत हुनुका साथै धुवाँको असर कम हुने, स्वास्थ्यमा सकारात्मक प्रभाव पर्ने र वातावरण संरक्षणमा समेत टेवा पुग्ने विश्वास व्यक्त गरे।
नगरपालिकाले आगामी दिनमा पनि वातावरणमैत्री तथा ऊर्जा दक्ष प्रविधिको विस्तार गर्दै नागरिकको जीवनस्तर उकास्ने कार्यक्रमलाई निरन्तरता दिने जनाएको छ।
