भक्तपुर । ख्वप्रिङ्ग इङ्लिस सेकेण्डरी स्कुलमा आगलागी हुँदा विद्यालयको दुई तला पूर्ण रूपमा क्षतिग्रस्त भएको छ।
भक्तपुर नगरपालिका–लिवालीस्थित विद्यालयमा भएको आगलागीबाट पाँच वटा कक्षा कोठा पूर्ण रूपमा नष्ट भएको विद्यालयका प्रधानाध्यापक विनोद प्रजापतिले जानकारी दिएका छन्।
विद्यालय प्रशासनका अनुसार आगलागीबाट करिब ५० लाख रुपैयाँ बराबरको क्षति भएको अनुमान गरिएको छ।
प्रारम्भिक अनुमानअनुसार विद्युत् सर्ट भएर आगलागी भएको हुन सक्ने बताइएको छ। हाल जलेका सामग्री हटाउने तथा सरसफाइको काम सुरु गरिएको विद्यालयले जनाएको छ।
पठनपाठन लामो समयसम्म अवरुद्ध हुन नदिने गरी व्यवस्थापनको काम भइरहेको विद्यालय प्रशासनले जनाएको छ।
प्रहरी वृत्त जगातीका अनुसार घटनाबाट भएको क्षतिको विस्तृत विवरण सङ्कलन गर्ने कार्य जारी छ।
