सुनसरी । कृषकको उत्पादन लागत घटाउँदै कृषि क्षेत्रलाई आधुनिक र व्यावसायिक बनाउने उद्देश्यसहित दुहबी नगरपालिकाले ५० प्रतिशत अनुदानमा विभिन्न कृषि सामग्री तथा कम्बाइन मिल वितरण गरेको छ।
नगरपालिकाको आर्थिक सहयोग तथा उन्नत कृषि सहकारी संस्था दुहबी–१० को आयोजनामा सम्पन्न कार्यक्रममा कृषकहरूलाई कृषि यान्त्रिकीकरण तथा प्राङ्गारिक खेती प्रवर्द्धनका लागि आवश्यक सामग्री हस्तान्तरण गरिएको हो।
कार्यक्रमअन्तर्गत धान, गहुँ, मकै तथा मसला कुटानी–पिसानीमा प्रयोग हुने करिब ५० हजार रुपैयाँ मूल्यका दुई वटा कम्बाइन मिल वितरण गरिएको छ। साथै कृषकहरूलाई २० एचपी क्षमताका तीन वटा पावर टिलर, छ वटा समरसीयल पम्प, १५ वटा स्प्रे मेसिन, सिँचाइका लागि १७५ केजी डेलिभरी पाइप, दुई हजार केजी प्राङ्गारिक मल, कालो लुनिया जातको रैथाने धानको बीउ, एक जनालाई बोरिङ तथा २० वटा त्रिपाल वितरण गरिएको छ।
कार्यक्रमलाई सम्बोधन गर्दै दुहबी नगरपालिकाका नगर प्रमुख वेद नारायण गच्छदारले किसानहरू नगरपालिकाको पहिलो प्राथमिकतामा रहेको बताए। आफू पनि किसान परिवारबाट आएको उल्लेख गर्दै उनले किसानका समस्या, आवश्यकता र चुनौतीबारे नजिकबाट बुझेको बताए।
“किसानको जीवनस्तर सुधार नगरी समृद्ध नगर निर्माण सम्भव छैन। त्यसैले कृषि उत्पादन वृद्धि, आधुनिक प्रविधिको प्रयोग र किसानको आय वृद्धि हुने कार्यक्रमलाई नगरपालिकाले निरन्तर प्राथमिकता दिँदै आएको छ,” नगर प्रमुख गच्छदारले भने।
उनका अनुसार नगरपालिकाले करिब ८ लाख रुपैयाँ अनुदान उपलब्ध गराएको छ भने कृषकहरूको समान लगानीसहित कुल १६ लाख रुपैयाँ बराबरका कृषि सामग्री वितरण गरिएको हो।
नेपालको कुल अर्थतन्त्रमा कृषि क्षेत्रको करिब ३० प्रतिशत योगदान रहेको उल्लेख गर्दै गच्छदारले दुहबीलाई क्रमशः विषादीरहित तथा प्राङ्गारिक खेतीको केन्द्रका रूपमा विकास गर्ने लक्ष्य रहेको जानकारी दिए। उनले सुनसरी जिल्लामै रैथाने धान खेतीको अभियान आफूले सुरुआत गरेको दाबी गर्दै स्थानीय उत्पादनको संरक्षण र प्रवर्द्धनमा जोड दिए।
नगर प्रमुख गच्छदारले प्रदेश सरकारसँगको सहकार्यमा करिब ५६ करोड रुपैयाँ लागतको एग्रो–प्रोसेसिङ उद्योग स्थापना गर्ने तयारी भइरहेको जानकारी पनि दिए। उक्त उद्योगमार्फत कृषि उत्पादनको प्रशोधन, भण्डारण तथा मूल्य अभिवृद्धि गरी किसानलाई उत्पादनको उचित बजार सुनिश्चित गर्ने लक्ष्य रहेको उनको भनाइ थियो।
कार्यक्रममा उपप्रमुख मेनुका पोखरेल खतिवडा, विजयकुमार चौधरी, उन्नत कृषि सहकारी संस्थाका अध्यक्ष लद्दुराम माझी, उपाध्यक्ष अनिल विश्वास, कृषि शाखा प्रमुख अजय गौतम तथा विभिन्न कृषि समूह, सहकारी संस्था र सिँचाइ आयोजनाका प्रतिनिधिहरूको उपस्थिति रहेको थियो।
सहभागी कृषकहरूले यस्ता अनुदानमूलक कार्यक्रमले कृषि उत्पादन वृद्धि, श्रम लागत न्यूनीकरण तथा आधुनिक कृषि प्रणालीको विकासमा महत्वपूर्ण योगदान पुग्ने विश्वास व्यक्त गरेका थिए। कृषकहरूले आगामी दिनमा यस्ता कार्यक्रमलाई अझ व्यापक बनाउँदै बढीभन्दा बढी किसानलाई लाभान्वित गराउन नगरपालिकासँग आग्रहसमेत गरेका छन्।
दुहबी नगरपालिकाले कृषि क्षेत्रलाई आत्मनिर्भर, प्रतिस्पर्धी र प्रविधिमैत्री बनाउने लक्ष्यसहित किसानमुखी कार्यक्रमलाई निरन्तरता दिइरहेको जनाएको छ। कृषि यान्त्रिकीकरणसँगै प्राङ्गारिक खेतीको प्रवर्द्धनले स्थानीय उत्पादन वृद्धि र किसानको आयस्तर सुधारमा टेवा पुग्ने अपेक्षा गरिएको छ।
