बजेट ‘जहाँ भोट, त्यहीँ बजेट’को नीति अनुसार आएको कांग्रेसको आरोप

काठमाडौं । प्रमुख प्रतिपक्षी दल नेपाली कांग्रेसले सरकारले आगामी आर्थिक वर्षका लागि प्रस्तुत गरेको बजेट आर्थिक रूपमा बोझिलो रहेको टिप्पणी गरेको छ।

अर्थमन्त्री डा. स्वर्णिम वाग्लेले संसद्मा बजेट प्रस्तुत गरेको २४ घण्टा नपुग्दै कांग्रेसले आफ्नो धारणा सार्वजनिक गर्दै सरकारले ‘जहाँ भोट, त्यहीँ बजेट’को नीति अवलम्बन गरेको आरोप लगाएको हो।

पार्टीका प्रवक्ता देवराज चालिसेले सामाजिक सञ्जाल फेसबुकमार्फत् प्रतिक्रिया जनाउँदै बजेटको समग्र स्वरूप आर्थिक रूपमा बोझिलो रहेको बताएका छन्। “समग्रमा यो बजेट आर्थिक रूपमा बोझिलो छ। तर, मृदुभाषामा कमजोरी लुकाइएको छ,” उनले लेखेका छन्।

कांग्रेसले सामाजिक सञ्जालबाट उदाएको सरकारले डिजिटल प्लेटफर्मलाई नै खुसी पार्ने गरी बजेट ल्याएको दाबी गरेको छ। चालिसेका अनुसार वितरणमुखी बजेट ल्याएर सरकारले आफ्ना पूर्वप्रतिबद्धता र घोषणाहरूलाई केवल प्रचारको माध्यम बनाएको देखिएको छ।

कांग्रेसले बजेटमा चालु खर्च अत्यधिक र पुँजीगत खर्च न्यून रहेको भन्दै असन्तुष्टि जनाएको छ। चालिसेका अनुसार कुल बजेटको ५९.८ प्रतिशत अर्थात् १२ खर्ब ७० अर्ब ५८ करोड रुपैयाँ चालु खर्चमा विनियोजन गरिएको छ भने पुँजीगत खर्च २०.३ प्रतिशत अर्थात् ४ खर्ब ३१ अर्ब १० करोड रुपैयाँ मात्र रहेको छ।

कांग्रेसले बजेटमाथि उठाएका मुख्य प्रश्नहरू यस्ता छन्–

• चालु खर्च नियन्त्रण गर्ने र पुँजीगत खर्च बढाउने विश्वसनीय योजना नदेखिएको।
• ६ खर्ब ५७ अर्ब २८ करोड रुपैयाँ ऋण उठाउने लक्ष्य पुँजीगत खर्चभन्दा २ खर्ब २६ अर्ब १८ करोड रुपैयाँले बढी रहेको।
• राजस्व संकलनको १४ खर्ब ५ अर्ब ३१ करोड रुपैयाँको लक्ष्य महत्वाकांक्षी भए पनि त्यसलाई समर्थन गर्ने उत्पादन, उद्योग, निर्यात र रोजगारी वृद्धिका ठोस आधार नभएको।
• आयकर दर घटाइए पनि बिजुली, शिक्षा र स्वास्थ्यजस्ता क्षेत्रमा नयाँ कर तथा शुल्क विस्तार गरिएकाले कर नीतिमा विरोधाभास देखिएको।
• किसान, गरिब तथा उत्पादनमुखी क्षेत्रलाई पर्याप्त प्राथमिकता नदिइएको तथा चिया, अलैँचीजस्ता निर्यातयोग्य वस्तुको प्रवर्द्धनका लागि उल्लेखनीय योजना नआएको।

कांग्रेसले बजेटले उत्पादन र निर्यात बढाउनेभन्दा उपभोगमा आधारित राजस्व संकलनलाई प्राथमिकता दिएको दाबी गर्दै यसले व्यापार घाटा झन् बढाउने सम्भावना रहेको जनाएको छ।