सुनसरी । दुहबी नगरपालिका अन्तर्गत रहेको श्री सरस्वती माध्यमिक विद्यालय का शिक्षक तथा शिक्षा क्षेत्रका सक्रिय व्यक्तित्व दुखाराम खाको नेतृत्वमा नेपाल शिक्षक महासङ्घ सुनसरी जिल्ला कार्यसमिति घोषणा गरिएको छ।
घोषणा सभा तथा सपथ ग्रहण कार्यक्रम भव्य रूपमा सम्पन्न भएको आयोजकले जनाएको छ। सम्भवतः संघीयता लागू भएपछि सुनसरी जिल्लामै पहिलो पटक नेपाल शिक्षक महासङ्घ जिल्ला कार्यसमिति गठन भएको दाबी गरिएको छ।
कार्यक्रममा नेपाल शिक्षक महासङ्घका केन्द्रीय निर्वाचन संयोजक गङ्गा ढुङ्गाना प्रमुख अतिथिका रूपमा उपस्थित थिए। त्यस्तै कमल प्रसाद घिमिरे, ज्योती कोइराला, रेणुका पोखरेल लगायत शिक्षा क्षेत्रका विभिन्न व्यक्तित्वहरूको सहभागिता रहेको थियो।
त्यसैगरी नेपाल शिक्षक सङ्घका अध्यक्ष बेणु प्रसाद सिग्देल तथा नेपाल शिक्षक सङ्गठन सुनसरीका अध्यक्ष रामानन्द मण्डल लगायतको विशेष उपस्थिति रहेको थियो।
नेपाल शिक्षक महासङ्घ सुनसरी जिल्ला समिति सदस्यमा निर्विरोध चयन भएका उमेश प्रसाद मेहता, जो श्री कृष्ण माध्यमिक विद्यालय का प्रधानाध्यापक हुन्, साथै तारानाथ चौधरी र आनन्दी चौधरी लाई पनि जिल्ला सदस्यमा मनोनित गरिएको छ।
सुनसरीका १२ स्थानीय तहमध्ये बर्जु गाउँपालिकाले सबैभन्दा पहिले नेपाल शिक्षक महासङ्घ गठन गरेको थियो। उक्त कार्यसमितिको अध्यक्ष विजय कुमार चौधरी रहेका छन्।
शिक्षक हकहित, शैक्षिक सुधार तथा शिक्षक एकताका लागि नेपाल शिक्षक महासङ्घले देशभर सक्रिय भूमिका निर्वाह गर्दै आएको बताइएको छ।
