काठमाडौँ– काठमाडौँ महानगरपालिकाले संस्थागत (निजी) विद्यालयमा कक्षा ११ र १२ अध्ययन गर्न चाहने विद्यार्थीका लागि छात्रवृत्तिको अनलाइन आवेदन खुला गरेको छ ।
महानगरपालिकाको शिक्षा विभागले बुधबार सूचना जारी गर्दै परीक्षा प्रणालीमार्फत योग्य विद्यार्थीलाई छात्रवृत्ति प्रदान गरिने जनाएको हो । विभागका अनुसार इच्छुक विद्यार्थीले जेठ १ गते बिहान १० बजेदेखि जेठ १० गते राति ११:५९ बजेसम्म अनलाइन फाराम भर्न सक्नेछन् ।
विद्यार्थीहरूले महानगरपालिकाको आधिकारिक वेबसाइटमार्फत आवेदन दिन सक्नेछन् । विषयगत अङ्कभार, विद्यालयअनुसारको छात्रवृत्ति कोटा र परीक्षा केन्द्रसम्बन्धी विस्तृत विवरण पनि वेबसाइटमा उपलब्ध गराइएको छ ।
छात्रवृत्ति छनोटका लागि जेठ १७ गते बिहान ८ बजेदेखि १० बजेसम्म परीक्षा सञ्चालन हुनेछ । परीक्षामा माध्यमिक तह (कक्षा १०) को पाठ्यक्रममा आधारित १०० वटा वस्तुगत बहुवैकल्पिक प्रश्न सोधिने महानगरले जनाएको छ ।
महानगरपालिकाका अनुसार शिक्षा ऐन तथा सम्बन्धित कानुन कडाइका साथ कार्यान्वयन गरिँदा छात्रवृत्ति पाउने विद्यार्थीको सङ्ख्या हरेक वर्ष बढ्दो क्रममा छ ।
गत शैक्षिक सत्र २०८२ मा मात्रै संस्थागत विद्यालयका २० हजारभन्दा बढी विद्यार्थीले छात्रवृत्ति पाएका थिए । महानगरका अनुसार कक्षा १ देखि १० सम्मका १६ हजार ९८० र कक्षा ११ का ३ हजार ३०२ गरी कुल २० हजार २८२ विद्यार्थी छात्रवृत्तिबाट लाभान्वित भएका थिए ।
