धनुषा । काठमाडौँबाट विराटनगर आउँदै गरेको बस आइतबार बिहान धनुषामा दुर्घटना भएको छ । बागमती प्रदेश ०१-००६ ख ५२३७ नम्बरको बस धनुषाको मिथिला नगरपालिका-९, फुटबल ग्राउन्ड नजिक पूर्व-पश्चिम राजमार्गमा दुर्घटना भएको हो ।
दुर्घटनामा १७ जना घाइते भएको नेपाल प्रहरीले जनाएको छ । अर्को बसलाई ओभरटेक गर्दा अनियन्त्रित भएर सडकमै पल्टिएको जिल्ला प्रहरी कार्यालय, धनुषाले जनाएको छ। घाइतेहरूलाई लालगढस्थित मोइल अस्पतालमा भर्ना गरिएको छ ।
बसमा ३३ यात्रु सवार रहेकोमा अरू यात्रु सकुशल रहेको प्रहरीले जनाएको छ ।
