काठमाडौं । निर्मला शर्माले वर्तमान सरकार प्रेस तथा अभिव्यक्ति स्वतन्त्रताको संरक्षणप्रति विश्वस्त हुन नसकिने बताएकी छन्। नेपाल पत्रकार महासंघ द्वारा विश्व प्रेस स्वतन्त्रता दिवसका अवसरमा जारी शुभकामना सन्देशमार्फत उनले यस्तो धारणा व्यक्त गरेकी हुन्।
उनका अनुसार पछिल्लो समय प्रेस स्वतन्त्रतासँग सम्बन्धित घटनाहरू बढ्दै गएका छन्, जसले लोकतान्त्रिक मूल्यप्रति चिन्ता बढाएको छ। “संविधानमा रहेको प्रेस तथा अभिव्यक्ति स्वतन्त्रताको रक्षा हुनेमा हामी सशंकित छौं,” उनले उल्लेख गरेकी छन्।
महासंघका अनुसार २०८२ सालमा मात्र १३१ वटा प्रेस स्वतन्त्रता हननका घटना दर्ता भएका छन्, जुन अघिल्लो वर्षको ७३ र त्यसअघिको ६२ घटनाको तुलनामा उल्लेखनीय वृद्धि हो। साथै पत्रकार तथा सञ्चार माध्यममाथि आक्रमणका ३०, पेशागत असुरक्षाका १८, कब्जा तथा अवरोधका २६, नीतिगत बन्देजका ३ घटना भएका छन्। यस अवधिमा २ जना पत्रकार पक्राउ परेका छन् भने १ जनाको शंकास्पद मृत्यु भएको उल्लेख गरिएको छ।
जेनजी आन्दोलनका क्रममा सञ्चार माध्यममा करोडौंको क्षति भएको र पाँच जना पत्रकार घाइते भएको भन्दै उनले प्रेस स्वतन्त्रता झन् जटिल बन्दै गएको बताइन्।
शर्माले पत्रकारविरुद्धका अपराधमा दण्डहीनता, सञ्चारमाध्यमको कमजोर आर्थिक अवस्था, पत्रकारको सुरक्षा चुनौती र बढ्दो मिथ्या सूचनालाई प्रेस स्वतन्त्रताका मुख्य चुनौतीका रूपमा औंल्याएकी छन्। साथै निजी सञ्चारमाध्यममा सरकारी विज्ञापन र सूचनामा लगाइएको रोक, पत्रकार पलायन र सञ्चार क्षेत्रको आर्थिक संकट समाधान गर्नुपर्ने आवश्यकता पनि उनले औंल्याइन्।
