काठमाडौं । नेपाली कम्युनिष्ट पार्टीले आगामी मङ्सिरमा एकता राष्ट्रिय महाधिवेशन आयोजना गर्ने घोषणा गरेको छ। पार्टीका संयोजक पुष्पकमल दाहाल ‘प्रचण्ड’को अध्यक्षतामा बसेको केन्द्रीय कार्य संयोजन समितिको बैठकले मङ्सिर ११ देखि १५ गतेसम्म काठमाडौंमा महाधिवेशन गर्ने निर्णय गरेको हो।
शनिबार जारी गरिएको विज्ञप्तिअनुसार साउन मसान्तसम्म सदस्यता नवीकरण तथा विस्तार अभियान सञ्चालन गरिनेछ। त्यसपछि भदौ १५ गतेसम्म वडा अधिवेशन, भदौ १६ देखि मसान्तसम्म पालिका, असोज मसान्तसम्म जिल्ला र कात्तिक १५ गतेसम्म प्रदेश अधिवेशन सम्पन्न गरिने कार्यतालिका तय गरिएको छ।
पार्टीका प्रवक्ता प्रकाश ज्वालाले जेठ मसान्तभित्र केन्द्रदेखि टोल तहसम्मका सबै संगठनात्मक संरचना तथा जनवर्गीय/मोर्चा संगठनहरूको एकीकरण र समायोजन सम्पन्न गरिने जानकारी दिए।
पार्टीले वडादेखि केन्द्रसम्मका सबै कमिटी समानुपातिक र समावेशी सिद्धान्तका आधारमा गठन गरिने जनाएको छ। साथै, निर्वाचित कमिटीमा अनुभवी, प्रौढ, युवा तथा नवयुवाको सहभागिता सुनिश्चित गर्दै युवा प्रतिनिधित्व ५० प्रतिशतसम्म पुर्याउने लक्ष्य लिइएको छ।
यसैबीच, पार्टीले संविधान संशोधनका लागि सुझाव दिन विशेष कार्यदल पनि गठन गरेको छ। उक्त कार्यदलमा देवप्रसाद गुरुङ, प्रकाश ज्वाला, प्रेमबहादुर सिंह, रनध्वज लिम्बू, रेखा शर्मा, गणेश विश्वकर्मा, डा. मुक्तिनारायण प्रधान, डा. खिमलाल देवकोटा, जगदेव चौधरी, डम्बर विक्रम कार्की र डा. रामबहादुर चौधरी रहेका छन्।
पार्टी एकीकरणपछि गठन भएको कार्यसंयोजन समितिको चैत १९ देखि वैशाख १४ सम्म बसेको बैठकले अन्तरिम विधान–२०८२ अनुसार केन्द्रीय कार्यसमितिलाई पूर्णता दिने निर्णयसमेत गरेको प्रवक्ता ज्वालाले जानकारी दिएका छन्।
