विराटनगर । नेपाल प्रिमियर लिग (एनपीएल) खेल्न नेपाल अाएका कर्णाली याक्सका पाकिस्तानी खेलाडी साहिबजादा फरहान श्रीलंकाविरुद्धको एकदिवसीय अन्तर्राष्ट्रिय (ओडीआई) खेलका लागि पाकिस्तान फर्किने भएका छन्।
कर्णाली याक्सका निर्देशक गृहेन्द्र घिमिरेका अनुसार अक्टोबर ३१ मा राष्ट्रिय टोलीको खेल सकिएपछि उनी पुनः एनपीएलमा फर्किने सम्भावना छ।
फरहानको अनुपस्थितिमा कर्णालीले अस्थायी रूपमा अर्को खेलाडी ल्याउने तयारी गरेको छ। कर्णालीले फरहानसँगै पाकिस्तानी खेलाडी हुसेन तलातलाई पनि टोलीमा अनुबन्ध गरेको छ।
घिमिरेका अनुसार पाकिस्तान क्रिकेट बोर्डले एनपीएल खेल्न नेपाल आएका पाकिस्तानी खेलाडीलाई एनओसी दिन थप २५ हजार अमेरिकी डलर मागेको छ। खेलाडीहरूले एनओसी लिएर नेपाल आइसकेपछि थप रकम मागिएको भन्दै उनले असन्तुष्टि व्यक्त गरेका छन्।
