काठमाडौं । काठमाडौंको बल्खुस्थित सुकुमवासी बस्ती खाली गराइएको केही घण्टापछि नजिकैको बागमती खोलामा एक पुरुष मृत अवस्थामा फेला परेका छन्। शुक्रबार बिहान घर भत्किएको देख्न नसक्ने भन्दै घरबाट निस्किएका ती व्यक्ति दिउँसो मृत अवस्थामा भेटिएको स्थानीयले बताएका छन्।
मृतक ६१ वर्षीय ईन्द्रबहादुर राई रहेको उनकी पत्नी सरिता राई ले पुष्टि गरिन्। “बिहान घर भत्किएपछि ‘हेर्न सक्दिनँ’ भन्दै एक्लै निस्किनुभएको थियो,” उनले भनिन्, “पछि यस्तो अवस्थामा भेटिनुभयो।”
घटनास्थलमा अहिले मृतककी पत्नी र छोरा उपस्थित छन्। स्थानीयका अनुसार राईको परिवार बल्खु क्षेत्रको सुकुमवासी बस्तीमा करिब १६–१७ वर्षदेखि बसोबास गर्दै आएको थियो। उनी बल्खुस्थित सब्जी मण्डीमा श्रमिकका रूपमा काम गर्दै आएका थिए।
यसैबीच जिल्ला प्रहरी परिसर काठमाडौं ले मृतकको पहिचान र मृत्युको कारणबारे औपचारिक पुष्टि गरेको छैन। प्रहरीका अनुसार परिवारसँग सम्पर्क गरी घटनाबारे थप अनुसन्धान भइरहेको छ।
स्थानीयले भने बस्ती हटाउने क्रममा उत्पन्न तनाव र मानसिक अवस्थासँग घटना जोडिएको हुनसक्ने आशंका व्यक्त गरेका छन्। यद्यपि, यसको आधिकारिक पुष्टि हुन बाँकी छ।
