काठमाडौं । बुद्ध जयन्तीकै दिन काठमाडौं महानगरपालिका–१४, बल्खुस्थित साङ्गे छोइलिङ्ग गुम्बा र सोही क्षेत्रको सुकुम्बासी बस्तीभित्र रहेको पाथीभरा देवीको मन्दिर डोजर प्रयोग गरी भत्काइएको छ। सार्वजनिक जग्गा अतिक्रमण हटाउने अभियानअन्तर्गत शुक्रबार बिहानैदेखि उक्त संरचना हटाइएको हो।
२०७८ सालमा दर्ता भएको साङ्गे छोइलिङ्ग गुम्बा वैशाख शुक्ल पूर्णिमाका दिन भत्काइएपछि स्थानीय बासिन्दाले असन्तुष्टि जनाएका छन्। उनीहरूका अनुसार कम्तीमा धार्मिक महत्वको दिन पारेर नभत्काउन आग्रह गरिएको थियो, तर सो आग्रह बेवास्ता गरिएको बताइएको छ।
स्थानीयका अनुसार डोजर चलाइँदा कतिपयले आफ्ना सामग्री जोगाउन हतार–हतार सामान सार्न बाध्य भएका थिए भने कतिपयले वर्षौंदेखि प्रयोगमा रहेका धार्मिक स्थल भत्किँदै गरेको दृश्य हेर्न विवश हुनुपरेको थियो। घटनास्थलमा सुरक्षाकर्मी र नगरप्रहरी परिचालन गरिएको थियो।
काठमाडौं महानगरपालिकाका अनुसार सार्वजनिक तथा सरकारी स्वामित्वको जग्गा अतिक्रमण गरी निर्माण गरिएका संरचना हटाउने अभियानअन्तर्गत गुम्बा र मन्दिर दुवै भत्काइएको हो। महानगरले डोजर चलाउनुअघि गुम्बाभित्र रहेका बुद्धका मूर्ति, धार्मिक सामग्री तथा अन्य महत्वपूर्ण वस्तुहरू सुरक्षित रूपमा बाहिर निकालिएको जनाएको छ।
महानगर स्रोतका अनुसार नदीकिनार तथा सार्वजनिक जग्गामा अनाधिकृत रूपमा बसोबास गर्दै आएका बस्तीहरू हटाउने अभियान केही दिनदेखि तीव्र बनाइएको छ। बल्खु क्षेत्रसँगै अन्य अतिक्रमित स्थानहरूमा पनि क्रमशः डोजर चलाउने योजना रहेको बताइएको छ।
यता, स्थानीय बासिन्दा र धार्मिक आस्थासँग जोडिएका व्यक्तिहरूले भने समय चयनप्रति आपत्ति जनाउँदै संवेदनशील विषयमा प्रशासनले थप ध्यान दिनुपर्ने बताएका छन्। उनीहरूले विकास र व्यवस्थापन आवश्यक भए पनि धार्मिक तथा सांस्कृतिक पक्षलाई सम्मान गर्नुपर्नेमा जोड दिएका छन्।
