बर्जु । घरदेखि वडासम्म र वडादेखि घरसम्म आवतजावत गर्न नसक्ने सेवाग्राहीले वडा कार्यालसम्म पुग्न दुःख गर्नुपर्दैन, मात्र वडा कार्यालयमा एकपटक फोन गरे पुग्छ । फोन गरेर बोलाउनेबित्तिकै सिटी सफारी हाजिर हुन्छ र वडा कार्यालय पुर्याएर काम सकिएलगत्तै घरसम्म पनि पुर्याउँछ । तर, यो सुबिधा सबैका लागि भने होइन ।
वडामा रहेका गर्भवती, सुत्केरी, अशक्त, वृद्ध तथा अपांगता भएका सेवाग्राहीलाई मध्येनजर गर्दै सुनसरीको बर्जु गाउँपालिका वडा नम्बर १ ले निःशुल्क सफारी सेवाको शुभारम्भ गरेको हो । सार्वजनिक यातायातको अभाव, आर्थिक अवस्थाको कमजोरी र शारीरिक असमर्थताका कारण यहाँका नागरिकहरूले आफ्नै अधिकारका सेवाहरूबाट बञ्चित हुनुपर्ने बाध्यता थियो ।
यही समस्याको स्थायी समाधान खोज्दै वडाध्यक्ष दिलबहादुर गुरुङले यो फरक र अनुकरणीय अवधारणाको जन्म दिएका हुन् । उनको फरक कन्सेप्टमा सुरु भएको यो सेवाको थालनी बिहीबार गाउँपालिका अध्यक्ष जिबच्छकुमार राय र प्रमुख प्रशासकीय अधिकृत सुधीर साफीले गरेका थिए । उद्घाटन समारोहमा स्थानीय जनप्रतिनिधि तथा वडाका नागरिक अगुवाहरूको उपस्थिति थियो ।
वडा सचिव मिलन खतिवडाका अनुसार पालिकाले दिएको चार लाख बजेटबाट चालकसहित सफारीको व्यवस्था गरिएको हो । उनका अनुसार यस सफारी गाडीको चार्जिङको व्यवस्था वडा कार्यालयकै परिसरमा गरिएको छ, जसले गाडीको सञ्चालन खर्च अझ न्यून राख्न मद्दत गर्छ भने सेवा विद्युतीय ऊर्जामा आधारित भएकाले यो पर्यावरणमैत्री पनि छ ।
विपन्न वर्गका सेवाग्राही, अशक्त, अपांगता भएका र जेष्ठ नागरिक तथा गर्भवती-सुत्केरी महिलालाई लक्षित गरी यो सेवाको थालनी गरिएको बताउँदै वडाध्यक्ष गुरुङले यसलाई अल्पकालीन नभई दीर्घकालीन रूपमा सञ्चालन गर्ने प्रतिबद्धता जनाएका छन् । यो सेवाको निरन्तरताका लागि स्रोत व्यवस्थापनको काम जारी रहेको उनले बताए । सिटी सफारी सेवा सम्भवतः नेपालमै पहिलोपटक भएको दाबी गरे ।
यता, गाउँपालिका अध्यक्ष रायले यो सेवा केवल एउटा यातायात सुविधामात्र नभएर सुशासन, समावेशिता र मानवीय संवेदनशीलताको उदाहरण भएको बताए । वडाध्यक्षको पहलमा थालिएको यो सेवा पूर्ण रूपमा सफल भएमा वडाहरूमा पनि लागू गराउने उनले बाचा गरेका छन् ।
बर्जु-१ को यो साहसिक र संवेदनशील कदमले स्थानीय सरकारले न्यून बजेटमा पनि जनजीवन सहज बनाउन सक्छ भन्ने सन्देश दिएको छ । यसले जनताको सरकार, जनतासम्मै भन्ने अवधारणालाई व्यावहारिक रूपमा अँगालेको छ ।
