झापा– झापा र सुनसरी जिल्लाबाट लागूऔषधसहित ६ जनालाई प्रहरीले पक्राउ गरेको छ।
प्रहरीका अनुसार आइतबार भद्रपुर नगरपालिका–५ का दुई फरक स्थानमा गरिएको विशेष अपरेसनमा ७ ग्राम १५० मिलिग्राम ब्राउन सुगरसहित चार जना पक्राउ परेका छन्। पक्राउ पर्नेमा बिबिसा चापागाईं, दिपक उप्रेती, प्रताप मादेन र अनुप लामगदे रहेका छन्।
यसैगरी इनरुवा नगरपालिका–४ बाट थप दुई जनालाई लागूऔषधसहित नियन्त्रणमा लिइएको छ। प्रहरीले सुमन यादव (राजा) र सरोज परियारबाट ट्रामाडोल ६०६ क्याप्सुल र नाइट्राजेपाम २० क्याप्सुल बरामद गरेको जनाएको छ।
प्रहरीले लागूऔषध ओसारपसार तथा कारोबारविरुद्ध विशेष निगरानी बढाएको बताउँदै पक्राउ परेकामाथि थप अनुसन्धान जारी रहेको जनाएको छ।
